Aravot.am-ը փետրվարի 23-ին «Փաստարկ» մամուլի ակումբում Գերագույն խորհրդի պատգամավոր Ազատ Արշակյանին խնդրեց անդրադառնալ ԱԺ ՀՀԿ խմբակցության պատգամավոր Մհեր Սեդրակյանի՝ լրագրողին հայհոյելու միջադեպին:
Ազատ Արշակյանը պատասխանեց. «Մարդիկ կան իշխանությունում, որոնք իշխանության մասին լսելիս կա՛մ պետք է ոտքի կանգնեն, կա՛մ ծլկեն, ճողոպրեն այդ հարթությունից: Որովհետեւ իշխանությունը նրանց համար սարսափելի բան է, դա իրենց բռնողն է, իրենց պատժողն է, իրենց կարգի հրավիրողն է, նրանք այդտեղ չպետք է լինեն: Դա արդեն չորրորդ իշխանության գործը չէ. չորրորդ իշխանությունը պետք է լրացուցիչ պաշտպանված լինի, բոլոր քաղաքացիները պետք է անձեռնամխելի լինեն, բայց հատկապես չորրորդ իշխանությունը, լրագրողները, նրանք շատ ավելի պաշտպանված պետք է լինեն: Ես կարծում եմ՝ իշխանությունը անելու բան ունի՝ պետք է հեռացվեն, պետք է պատժվեն, ես նույնիսկ համաձայն եմ, որ լուծարվի Ազգային ժողովը:
Կտրուկ քայլեր, այն, ինչը որ Սերժ Սարգսյանը մի քանի օր առաջ հայտարարեց իր հայտնի ելույթում, հարկավոր է ուժ կիրառել, այսինքն՝ կասեցնել պետական կառույցների, մարմինների գործունեությունը, որոնք ակնհայտորեն ունեն քրեաօլիգարխիկ նկարագիր: Ես չեմ ասում՝ դատարանով, դատարանով չէ: Սահմանադրության երաշխավորը մինչեւ 2018 թվականը նախագահն է, նախագահն էլ պետք է կասեցնի նրանց գործունեությունը, եւ հետո արդեն իրավապահ մարմինները դրանով կզբաղվեն, դատարան կգնա-չի գնա նշանակություն չունի, եւ այդտեղ էլ կանցկացվեն նոր ընտրություններ կամ նոր նշանակումներ, որոնք ակնհայտորեն պետք է լինեն մարդասիրական, մտավորական, բարեկիրթ: Բարեկիրթ մարդիկ պետք է լինեն Հայաստանի Հանրապետության իշխանությունում, եւ այդ բարեկիրթ մարդիկ պետք է լինեն հերոսները»:
Կարդացեք նաև
Անդրադառնալով լրագրողների կազմակերպած բողոքի ցույցին՝ Ազատ Արշակյանը հայտարարեց, որ շնորհիվ այդ ցույցի չիմացող պատասխանատուները կիմանան, որ տեղի է ունեցել կոպիտ, Հայաստանի Հանրապետության քաղաքացուն անհարիր վարքագիծ, եւ համապատասխան պատիժներ կսահմանվեն՝ «Լրագրողի հետ՝ միայն հարգալից»:
«Ով, որ լրագրող չէ, լրագրողների հարցերին պետք է կոռեկտ պատասխաններ տա: Եթե ուզում են լրագրողների հետ այլ հարաբերություններ ունենալ, ուրեմն՝ ինքն էլ պետք է դառնա լրագրող: Այդ դեպքում՝ մենք էլ պետք է ասենք՝ լավ էլի, այդպես մի արեք»,- հավելեց Ազատ Արշակյանը:
Ամի ՉԻՉԱԿՅԱՆ
