«Արման Թաթոյանը սպասարկել է իշխանության քաղաքականությունը: Եթե այդպես չէ եւ այդ անձը կապ չի ունեցել սպասարկման հետ, ապա ինքը թող մատնանշի մի գործ, որի վերաբերյալ ինքը այլ կարծիք է հայտնել»,- ԱԺ-ում Մարդու իրավունքների պաշտպանի ընտրության ժամանակ իր ելույթում ասաց «Ժառանգության» պատգամավոր Զարուհի Փոստանջյանը՝ վստահեցնելով, որ դա ոչ թե ՄԻՊ ընտրություն է, այլ՝ ՀՀԿ-ի կողմից նշանակում:
Փոստանջյանի խոսքերով՝ ՀՀ-ում մարդու իրավունքների բազմաթիվ խախտումներ կան. «Եվ 10 տարի իր գործունեության ընթացքում այս մարդը ձեն չի հանել»:
Զարուհի Փոստանջյանը քննադատեց Թաթոյանին, որ չունի իր ուրույն կարծիքը, հարցնում են՝ ՀՀ-ում քաղբանտարկյալներ կա՞ն, եղե՞լ են, պատասխանում է՝ պետք է կոնկրետ գործով ուսումնասիրի, չգիտի:
Հետո Փոստանջյանը հեգնեց, որ ինչ հարց տալիս են՝ Թաթոյանն ասում է՝ չեմ մասնակցել այսպիսի քննարկմանը, չգիտեմ, պետք է ուսումնասիրեմ, նոր ասեմ. «Սա նշանակում է, որ այս մարդը անդեմ է: Ես դեմ եմ քվեարկելու, այս նշանակումը դասվելու է այն նշանակումների շարքը, որն ունեցել ենք մինչ այժմ: Մենք չենք ունենալու այն մարդու իրավունքների պաշտպանը, որը սպասարկելու է մեր շահը»:
Կարդացեք նաև
ԱԺ փոխխոսնակ Էդուարդ Շարմազանովը հորդորեց Զարուհի Փոստանջյանին չվիրավորել մարդուն. «Ի՞նչ է նշանակում՝ այդ մարդն անդեմ է»:
Հռիփսիմե ՋԵԲԵՋՅԱՆ
