Ինչպես ավելի վաղ հայտնել էինք, ՄԱԿ-ի մանկական հիմնադրամի նախաձեռնությամբ ստեղծվել է երեխայի իրավունքների գործիքակազմը ներկայացնող ձեռնարկ, որի շնորհանդեսը տեղի ունեցավ այսօր:
«Կարեւոր է, երբ մտահոգ մարդկանց համար հնարավորություն է ստեղծվում ջանքերը համատեղելու: Նպատակը մեկն է՝ երեխաների համար մատչելի արդարադատության համակարգի ստեղծում: Սա ավելի լայն պետք է հասկանալ, քան պարզապես դատարան դիմելու իրավունքը»,-իր ելույթում ասաց Արդարադատության նախարար Արփինե Հովհաննիսյանը:
Հայաստանում ՄԱԿ-ի մանկական հիմնադրամի ներկայացուցիչ Տանյա Ռադոչայը նշեց, որ քաղաքական իրավիճակն ու գործընթացները եւս ազդում են երեխաների իրավունքների պաշտպանության վրա:
Այս մասին Aravot.am-ը մեկնաբանություն խնդրեց Արփինե Հովհաննիսյանից: «Ցանկացած իրավիճակում քաղաքական մթնոլորտը նշանակություն ունի: Հայաստանում հիմա էլ երեխաների իրավունքների պաշտպանության հետ կապված հարցերում իրականացվող քաղաքականությունը նպաստող է: Տարբեր գերատեսչություններ իրենց գործունեության ընթացքում զբաղվում են այս խնդիրներով եւ մեծ նշանակություն են տալիս երեխայի իրավունքների պաշտպանությանը: Պատահական չէ, որ նախորդ տարի Արդարադատության նախարարությունը ստանձնեց համակարգողի դեր, ստեղծվեց նախարարությանը կից խորհուրդ»,-ասաց Արփինե Հովհաննիսյանը:
Կարդացեք նաև
Նախարարը մեջբերեց ՀՀ-ում Եվրամիության դեսպանի խոսքերը. «Մենք փոքր երեխաների փոքր իրավունքների հետ գործ չունենք, իրականում մարդու իրավունքների հետ գործ ունենք: Արդարադատության նախարարությունը, որպես մարդու իրավունքների ազգային ռազմավարության համար պատասխանատու սուբյեկտ, իր վրա համակարգման գործառույթը վերցրեց եւ օրենսդրական քաղաքականության առումով ստանձնեց առաջատարի դեր»:
Երեխաների իրավունքների պաշտպանության ոլորտում Արդարադատության նախարարության աշխատանքի մասին մանրամասն՝ քիչ ուշ՝ տեսանյութում:
Լուիզա ՍՈՒՔԻԱՍՅԱՆ
