Քաղաքացիական ակտիվիստ Վարդգես Գասպարիի կալանավորման վերաբերյալ ԱԺ-ում այսօր ի թիվս այլ պատգամավորների, հայտարարություն արեց նաեւ ՀԱԿ խմբակցության պատգամավոր Նիկոլ Փաշինյանը:
Նա նշեց, որ Գասպարի կալանավորելու որոշումը կայացրել է Շենգավիթ վարչական շրջանի առաջին ատյանի դատավոր Նելլի Բաղդասարյանը. «Կալանքի որոշման հիմքերը մեղմ ասած կասկածելի են, չեմ ուզում ասել՝ ապօրինի: Կալանքից հետո ես երկու անգամ եղել եմ «Նուբարաշեն» քրեակատարողականում: Նա ունի առողջական խնդիրներ: Նա ճնշման հետ կապված խնդիր ունի,. Շաքարային դիաբետի հետ կապված խնդիր ունի: Տվյալ դեպքում նրան կալանքի տակ պահելը շատ նման է խոշտանգման՝ մանավանդ, որ այն գործը, որով ինքը անցնում է, այդ գործով առավելագույն պատիժ է սահմանված կալանքը 2-3 ամիս: Նման գործով մարդուն կալանավորելը որոշակի հետեւությունների հիմք է տալիս»:
Ըստ Փաշինյանի, «Նուբարաշեն» քրեակատարողականում վերջին ամիսներին եղել է եւ գտնում է, որ երբ ակտիվիստներին չեն կարողանում դատաիրավական գործընթացներում ընկճել, իշխանությունը դրսի ուժերի միջոցով օգտագործում է կրիմինալ տարրի՝ նրա միջոցով որոշակի ազդեցություն գործելու համար. «Խստիվ դատապարտում եմ Վարդգես Գասպարիի կալանավորումը, եւ դա համարում եմ քաղաքական հետապնդման ցայտուն օրինակ»:
Փաշինյանը հայտարարեց, որ այս նստաշրջանի օրակարգի բոլոր հարցերին ինքը դեմ է քվեարկելու՝ ի նշան բողոքի Վարդգես Գասպարիի կալանավորման:
Կարդացեք նաև
Հռիփսիմե ՋԵԲԵՋՅԱՆ
