Գալուստ Սահակյանի առողջական վիճակը լավ է, մի քանի օրից կգա աշխատանքի: Այսօր ԱԺ նիստի սկզբում այս մասին հայտնեց ԱԺ փոխխոսնակ Հերմինե Նաղդալյանը:
ՀԱԿ խմբակցության ղեկավար Լեւոն Զուրաբյանն էլ հայտարարություն արեց Վարդգես Գասպարիի կալանավորման հետ կապված: Նրա խոսքերով՝ քաղաքական հայացքների համար հետապնդումներ անհանդուրժելի է որեւէ ժողովրդավարական երկրի համար: Տարին սկսվեց Գեւորգ Սաֆարյանի կալանավորմամբ, իսկ երկու օր առաջ կալանավորվեց ակտիվիստ Վարդգես Գասպարին՝ միայն նրա համար, որ իշխանությունների կամայականությունների դեմ կազմակերպում է բողոքի ակցիաներ»:
Նա հորդորեց ոստիկանությունից եւ դատախազությունից ԱԺ-ն բացատրություններ պահանջի Գասպարիի ապօրինի ազատազրկման համար եւ ԱԺ-ին ներկայացվեն ձեռք բերված տեղեկությունները:
Կարդացեք նաև
ԱԺ փոխխոսնակ Էդուարդ Շարմազանովը պատասխանեց, որ ցանկացած ժողովրդավարական երկրում քաղբանտարկյալների առկայությունն անթույլատրելի է. «Մենք ՀՀ-ում ցավոք տեսել ենք ժամանակաշրջան, երբ ունեցել ենք քաղբանտարկյալներ, բայց այդ ժամանակները վաղուց անցել են, մնացել են նախորդ դարում»:
Ինչ վերաբերում է Գասպարիին՝ Շարմազանովն ասաց, որ ուժային կառույցները կներկայացնեն իրենց կարծիքները. «Մենք իրավունք չունենք միջամտելու այն գործառույթներին, որտեղ կա օրենք: Եթե մենք կտեսնենք, որ կա օրենքի խախտում, կամայական դրսեւորում, բնականաբար, խորհրդարանն իր կարծիքը կհայտնի: Իրավական խնդրի մեջ քաղաքական խնդիր չտեսնենք: Իմ խորին համոզմամբ, այս հարցում քաղաքական ենթատեքստ չկա: Ձեզ էլ կոչ կանեմ դատավորի կամ դատախազի գործառույթ չվերցնել ձեզ վրա»:
«Ես մի քիչ զարմացած եմ ձեր հակազդեցությունից: Ձեր պահվածքով շատ ավելի անհանդուրժելի վերաբերմունք դրսեւորեցիք այն հարցերի վերաբերյալ, քան դա անում է Գալուստ Սահակյանը»,- արձագանքեց Լեւոն Զուրաբյանը՝ նկատելով, որ Գալուստ Սահակյանը շատ ավելի հանդուրժող ու համբերատար է:
Նրա խոսքով «Քաղբանտարկյալների մասին դուք ընդհանրապես պիտի չխոսեք, որովհետեւ 2008-ից հետո 70 մարդ բանտերում եք պահել: Բոլորը մեր կուսակցությունների առաջնորդներ են եղել, հայտնի ակտիվիստներ: Դրա մասին դուք իրավո՞ւնք ունեք խոսելու ընդհանրապես»:
Հռիփսիմե ՋԵԲԵՋՅԱՆ
