ՄԱԿ-ի մանկական հիմնադրամի հայաստանյան գրասենյակը, ՀՀ արտաքին գործերի նախարարությունը, Եվրոպական Միությունը և Գերմանական զարգացման համագործակցությունն այսօր ներկայացրեցին ԵՄ-ի եւ ՅՈՒՆԻՍԵՖ-ի մշակած «Երեխայի իրավունքների գործիքակազմը»: Հայերեն թարգմանված ձեռնարկը ներառում է երեխաների իրավունքների պաշտպանությանն առնչվող իրավական նորմեր, հայեցակարգեր եւ առաջարկներ:
Հայաստանում ՄԱԿ-ի մանկական հիմնադրամի ներկայացուցիչ Տանյա Ռադոչայը նշեց, որ ՄԱԿ-ի մանկական հիմնադրամը գործակցում է ՀՀ կառավարության եւ քաղաքացիական հասարակության հետ՝ երեխաների իրավունքների իրացման ուղղությամբ. «Հայաստանն այն եզակի պետություններից է, որը երեխաների իրավունքներն ամրագրեց նաեւ փոփոխված Սահմանադրության մեջ: Սակայն շատերը գիտեն, որ երեխայի իրավունքների պաշտպանությունը եւ դրանց իրագործումը բարդ ճանապարհ է: Այսօր քաղաքականության հետ կապված տարբեր ընտրություններ են կատարվում աշխարհում: Պետք է հասկանալ՝ ինչպես են դրանք ազդում երեխաների վրա»:
Հայաստանում ԵՄ պատվիրակության ղեկավար Պյոտր Անտոնի Սվիտալսկու խոսքով՝ գործիքակազմը եւս մեկ ապացույց է առ այն, որ երեխաների իրավունքների հարցը ԵՄ-ի համար շատ կարեւոր է. «Պատրաստ ենք օգնել Հայաստանին՝ երեխաների իրավունքների պաշտպանության գործում արդյունքների հասնելու համար: Գործիքակազմը հեշտ ընթեռնելի չէ, նախատեսված է մասնագետների համար, ուստի հանրությունը կարող է դժվարությունների հանդիպել: Գործիքակազմը իրազեկման մասին է: Հայաստանում կարեւոր այլ հարցեր էլ կան, բայց հավատացեք՝ այս ոլորտը գնալով ավելի մեծ կարեւորություն է ստանում»:
Կարդացեք նաև
Հայաստանում Գերմանիայի Դաշնային Հանրապետության փոխդեսպան Նադիա Լիխտենբերգերն էլ փաստեց, որ վերջին տարիներին Հայաստանում ստեղծվել են երեխաների խնամքի եւ իրավունքների պաշտպանության կենտրոններ:
Հավելենք, որ առաջիկա երկու օրում կկազմակերպվի ներկայացված գործիքակազմի մասին դասընթաց՝ նախատեսված ՀՀ Կառավարության անդամների, քաղաքացիական հասարակության և մասնավոր հատվածի ներկայացուցիչների համար:
Լուիզա ՍՈՒՔԻԱՍՅԱՆ
