«Հայկական ժամանակ» թերթի հարցերին պատասխանել է ՕԵԿ փոխնախագահ Մհեր Շահգելդյանը:
– Ինչպե՞ս եք վերաբերում Հրանտ Բագրատյանի այն հայտարարությանը, թե 2017թ. խորհրդարանական ընտրություններից առաջ անհրաժեշտ է նախընտրական դաշինք ստեղծել, որպեսզի հնարավոր լինի հաջողության հասնել:
– Համագործակցության, միավորման տեսանկյունից եթե դա օգնելու է երկրում ինչ-որ բան առաջ տանելուն, միանշանակ դրական ենք վերաբերում: Քննարկումներ կլինեն, որոշումներ կլինեն: Որոշումներ կընդունի արդեն ՀՎ կառավարման խորհուրդը: Ընդհանուր տեսանկյունից դրական ենք գնահատում եւ հարգանքով ենք վերաբերում Հրանտ Բագրատյանին, որն այս երկրում ճանապարհ անցած քաղաքական գործիչ է:
– Իսկ ինչո՞ւ եք փոխում ՕԵԿ անվանումը եւ ընտրում ՀՎ անունը:
Կարդացեք նաև
– Այս գործընթացի հիմքում դրված չէ այն փիլիսոփայությունը, որ ՕԵԿ-ն է, իսկ մյուս կուսակցությունները գալիս են միանալու մեզ: Ոչ: Փիլիսոփայությունն այն է, որ քաղաքական ուժերն են, այդ թվում նաեւ՝ ՕԵԿ-ը: Իհարկե, դա Արթուր Բաղդասարյանի նախաձեռնությունն է, բայց բոլոր քաղաքական ուժերը համատեղ կերպով ձեւավորում են միավորում, այնուհետեւ քննարկումներով որոշում են, թե ինչպես պետք է շարունակեն աշխատել քաղաքական դաշտում: Եվ եղավ որոշում՝ ձեւավորել նոր կուսակցություն՝ «Հայկական վերածնունդը»: Սա նոր ֆորմատը է Հայաստանում, երբ կուսակցությունները հավաքվում եւ նոր կուսակցություն են ձեւավորում: Օրենքով դա ամրագրված է, բայց նախադեպը չի եղել:
– Կարծիք կա, որ դուք պարզապես ցանկանում եք ձերբազատվել ՕԵԿ անվան բացասական համբավից:
– Ոչ, դրանք անմիտ կարծիքներ են: Միավորման այս ձեւաչափն ու գաղափարը ՀՀ վերածնունդն է, սա է բերել անվան ընտրությանը: Անվան ձեւավորումը եղել է համատեղ քննարկումների արդյունքում:
– Ի դեպ, ձեզ մեղադրում են այդ անվանումը գողանալու մեջ:
– Ամեն մեկը կարող է խոսել՝ ինչ ուզում է: Դա նույնն է, որ Արարատ անունի համար մեկը մյուսին մեղադրի: Ի վերջո, ՕԵԿ-ն իր ստեղծման օրվանից խոսել է բարեփոխումների, նորարարության մասին, վերածնունդի ու նոր Հայաստանի մասին: Սա մեր անցած քաղաքական ճանապարհի կարեւորագույն տեսլականներից մեկն է: Երկրում անհրաժեշտ է քաղաքացու ներուժի բացահայտման, վերածնման մեխանիզմ:
– Իսկ ՀՎ կուսակցության նախագահը Արթուր Բաղդասարյա՞նն է լինելու:
– Համագումարը կընտրի նախագահին: Պարոն Բաղդասարյանը նախաձեռնողն է: Իսկ այս գաղափարներն ու մոտեցումները միանշանակ բոլոր քաղաքական ու հասարակական ուժերի կողմից ընդունվում ու շատ բարձր են գնահատվում:
– Շարունակելո՞ւ եք համագործակցել Ռուսաստանի հայերի միության նախագահ Արա Աբրահամյանի, հիմա նաեւ՝ նրա «Ազգային միասնություն» շարժման հետ: Կարծիք կար, որ դուք պետք է լինեիք նրա քաղաքական հենարանը:
– Կան շատ նորմալ հարաբերություններ, այսօրվա դրությամբ խոսքը վերաբերում է համապատասխան շարժմանը, ինչպես նաեւ ֆորումներին: Համագործակցության եզրեր կան, ես կարող եմ ասել, որ ցանկացած դեպքում մենք հակադիր դաշտերում չենք աշխատելու: Մնացածը հետո կերեւա:
– Իսկ ՕԵԿ-ը խանդո՞վ չի վերաբերում Հանրապետական եւ Դաշնակցություն կուսակցությունների համագործակցությանը: Չէ՞ որ նախկինում դուք նույնպես նրանց հետ նույն կոալիցիայում էիք:
– Բացարձակապես: Նման բան չի կարող լինել:
– ՀՀԿ-ն ու ՀՅԴ-ն քննարկում են, իրենց բառերով ասած՝ երկարատեւ, ապագային միտված համագործակցության հարցը: Հնարավո՞ր է, որ դուք էլ այդ համագործակցությանը միանաք արդեն 2017թվականի ընտրություններից հետո:
– Այսօր մենք նման խնդիր չենք քննարկում, սրանով ես փակում եմ այդ հարցը:
Արմինե ԱՎԵՏՅԱՆ
Հրապարակումն ամբողջությամբ՝ «Հայկական ժամանակ» թերթի այսօրվա համարում:
