ՀՀ կառավարությանն առընթեր պետեկամուտների կոմիտեի Էրեբունու հարկային տեսչության կողմից 2009թ. սեպտեմբերի 17-ին ՀՀ ԿԱ ՊԵԿ հետաքննության վարչություն է ուղարկվում «Յուճաղ» ՍՊ ընկերության վերաբերյալ ՀՀ ԿԱ ՊԵԿ Էրեբունու հարկային տեսչության եւ ՀՀ ԿԱ ՊԵԿ հարկային տեսչությունների աշխատանքների համակարգման վարչության հարկային հսկողության համակարգման եւ կազմակերպման բաժնի կողմից կազմված ստուգման ակտը:
ՊԵԿ հետաքննության վարչության կողմից նյութեր են նախապատրաստվում, ապա որոշում է կայացվում քրեական գործ հարուցելու մասին:
Էրեբունու հարկային տեսչությունում հաշվառված «Յուճաղ» ՍՊ ընկերության տնօրեն Ռոբերտ Մարտիրոսյանի նկատմամբ հարուցվում է քրեական գործ:
Դատարան ուղարկված քրեական գործի նյութերի համաձայն, Ռ. Մարտիրոսյանը, Իրանի Իսլամական Հանրապետության քաղաքացի, ընկերության փաստացի ղեկավար Նադեր Քարիմյանիի կազմակերպմամբ, 2007-2009թթ. ընթացքում Հայաստանի տարածքում իրականացրել է շահույթ հետապնդող առեւտրային գործունեություն: Սակայն նա, «հարկերը վճարելուց խուսափելու դիտավորությամբ», գործունեության վերաբերյալ հարկային տեսչությանը ներկայացրած հարկման համար հիմք հանդիսացող 2007թ. եւ 2008թ. շահութահարկի, 2009թ. 2 ամիսների ԱԱՀ-ի հաշվարկներում ակնհայտ խեղաթյուրված տվյալներ է մտցրել: Ըստ մեղադրանքի կողմի, նա չարամտորեն խուսափել է պետբյուջե վճարել 54.869.400 դրամ՝ ԱԱՀ-ի շահութահարկի եւ սոցվճարի գումարները։
Ռոբերտ Մարտիրոսյանի նկատմամբ խափանման միջոց է ընտրվում կալանավորումը, սակայն նա առժամանակ չի հայտնաբերվում, հայտարարվում է հետախուզում:
Հայտնաբերվելուց հետո Ռ. Մարտիրոսյանի գործով որոշում է կայացվել կասեցված վարույթը վերսկսելու մասին։
Կարդացեք նաև
Ի դեպ, 2015թ. հունվարի 21-ին որոշում է կայացվել քրեական գործից մեղադրյալ Նադեր Ալիի Քարիմյանիի մասը, որպես առանձին քրեական գործ, անջատելու մասին։
Տեղեկացնեմ, որ ամբաստանյալ Ռոբերտ Մարտիրոսյանը ցուցմունք է տվել այն մասին, որ «Յուճաղ» ՍՊ ընկերությունը փաստացի կազմակերպել եւ ղեկավարել է Իրանի Իսլամական Հանրապետության քաղաքացի Նադեր Քարիմյանիին։ Ընկերությունը 2007-2009թթ. Իրանի Իսլամական Հանրապետությունից Հայաստան է ներմուծել տարբեր տեսակի տնտեսական ապրանքներ:
Ամբաստանյալ Ռոբերտ Մարտիրոսյանը ցուցմունքում հայտնել էր, թե չունի համապատասխան հաշվապահական գիտելիքներ:
Ընկերության հաշվապահը, նույն ցուցմունքի համաձայն, հաշվարկել եւ մուծել է շահութահարկը, ավելացված արժեքի հարկը, նա է հաշվարկել, կազմել ու լրացրել հարկային մարմիններ ներկայացվող հաշվետվությունները, որոնք ինքը չի ստորագրել, ինքը հարկեր վճարելուց խուսափելու դիտավորություն չի ունեցել, հետեւաբար, հաշվետվություններում խեղաթյուրված տվյալներ չի մտցրել։
Ռոբերտ Մարտիրոսյանի պաշտպաններն են Ա. Շահբազյանը եւ Գ. Շահվերդյանը, որոնք միջնորդություն են ներկայացրել դատաքննության փուլում, որպեսզի նշանակվի դատաձեռագրային փորձաքննություն։
Ըստ պաշտպանների, Ռոբերտ Մարտիրոսյանը չի հարցաքննվել 2007թ. 3-րդ եւ 4-րդ եռամսյակների, 2008թ. հունվար-հոկտեմբեր եւ դեկտեմբեր, 2009թ. փետրվար-մարտ ամիսներին վերաբերող եւ հարկային մարմիններին ներկայացված հաշվետվությունների կապակցությամբ, չի նշանակվել դատաձեռագրային փորձաքննություն, եւ որ գնահատական չի տրվել այն բանին, որ ընկերության տնօրենի անվան դիմաց դրված ստորագրությունները Ռ. Մարտիրոսյանինը չեն:
Ի դեպ, երբ պաշտպանական կողմը միջնորդություն է ներկայացրել դատարան, նշվել է, թե իրենց պաշտպանյալը «ակնոց չի օգտագործում», «գրում է աջ ձեռքով, ձեռքերին ֆիզիկական թերություններ, արատներ կամ առանձնահատկություններ չկան»։
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
19.02.2016
