Այսօր Հայաստանի ազգային պատկերասրահում տեղի ունեցավ Չինական Գարնան տոնին նվիրված միջոցառման բացման արարողությունը, որի շրջանակներում ներկայացվեց «Չինական ամանորյա բացիկների» ցուցահանդեսն և չինական գեղանկարչության անկյունը:
Միջոցառմանը մասնակցում էին Հանրապետության մարզերի և Երևանի 42 դպրոցների 500 աշակերտներ: Միջոցառման ընթացքում շնորհվեցին հավաստագրեր և նվերներ մասնակից դպրոցների տնօրեններին և երեխաներին:
Միջոցառմանը ներկա էր Հայաստանի Հանրապետությունում Չինաստանի Ժողովրդական Հանրապետության արտակարգ և լիազոր դեսպան Թիան Էրլունը, որը նշեց, թե շատ ուրախ է նման համագործակցության համար և վստահ է, որ կունենա շարունակություն. « Ես տեսնում եմ, որ ինչպես Չինաստանում, այնպես էլ այստեղ՝ Հայաստանում, Ամանորն ամենասիրված տոնն է: Պատահական չէ, որ հայ դպրոցականները նման ոգևորությամբ մոտեցան նախագծին»:
Կարդացեք նաև
Դեսպանը կարծում է, որ սա հրաշալի հնարավորություն է ծանոթանալու չինական մշակույթին. «Այս ցուցահանդեսն օգնեց երեխաներին ավելի շատ բան իմանալ չինական ամանորի և մշակույթի մասին։ Երկու երկրների համագործակցության հիմնական նպատակներից մեկն այն է, որ մեր ժողովուրդներն ու երեխաները ավելի տեղեկացված լինեն և շատ բան իմանան միմյանց մասին»:
Կոնֆուցիոսի ինստիտուտի հայկական կողմի տնօրեն Գոռ Սարգսյանն էլ ավելացրեց, որ նման միջոցառում առաջին անգամ է անցկացվում աշխարհում գործող Կոնֆուցիոսի ինստիտուտների գործունեության շրջանակում. «Նման միջոցառումները նպաստում են այլ ժողովուրդների մշակույթի զարգացմանն ու տարածմանը մեր երկրում: Մենք հաճելիորեն զարմացել էինք երեխաների ոգևորությունից: Ներկայացված աշխատանքները գերազանցեցին մեր սպասելիքները»:
Երևանի Գուրգեն Մարգարյանի անվան համար 94 դպրոցի տնօրեն Սուսաննա Վարդանյանն ասաց, որ երեխաները մեծ ոգևորությամբ են մասնակցել. «Սա առաջին անգամը չէ, որ մասնակցում ենք նման միջոցառումների: Մենք առանձին փոքրիկ չինական ցերեկույթ կազմակերպել էինք նաև դպրոցում, քանի որ մասնակից երեխաները շատ էին: Սակայն ընտրեցինք վեց աշխատանք, որոնք այսօր այստեղ ներկայացված են»:
Երևանի Չեխովի անվան համար 55 դպրոցի աշակերտուհի տասնամյա Ալիսան մեծ սիրով է պատրաստել բացիկը. «Մտածեցի, քանի որ կապիկի տարի է, պատկերել կապիկներ բացիկի վրա, և աղջիկ ու տղա նկարեցի, որ ոչ մեկ չնեղանա.մի քիչ մայրիկս է օգնել, բայց մտահղացումը իմն է եղել»:
Արփի ԿԻՐԱԿՈՍՅԱՆ
