«Այն ուժերը, որոնք հետեւողականորեն պայքարեցին՝ փորձելով կանխել դեկտեմբերի 6-ին տեղի ունեցած պետական հեղաշրջումը, այդ ուժերը եկել են ընդհանուր հայտարարի եւ միասնական օրակարգով Մարտի 1-ին հավաքվելու են Ազատության հրապարակում, որպեսզի իրենց բողոքը արտահայտեն այն դառը իրականության դեմ, որ անցել է արդեն 8 տարի, բայց 10 անմեղ զոհերի համար ոչ մեկը չի պատժվել:
10 երեւանցիներ գնդակահարվեցին միայն այն բանի համար, որ համարձակվել էին իրենց ձայնը բարձրացնել՝ ընդդեմ կեղծված ընտրությունների»,- այսօր «Նոր Հայաստան» շարժման հերթական ասուլիսում ասաց շարժման անդամ Հմայակ Հովհաննիսյանը:
Ըստ նրա, եթե չլիներ Մարտի 1-ի սպանդը, չէր լինի դեկտեմբերի 6-ը. «Մենք ապրում ենք դեռ մարտիմեկյան մղձավանջային գիշերում: Դուրս կգայինք, եթե մեղավորները կանգնեին արդար դատարանի առջեւ: Մեր երկրում չկա արդարություն, չկան իրավունքներ»:
Հմայակ Հովհաննիսյանը որտեղից որտեղ հիշեցրեց Շարլ Ազնավուրի խոսքերը՝ ուղղված իշխանությանը. «Ասել էր, որ դա մաֆիա է, մաֆիոզ ռեժիմ է: Այդ մաֆիոզ ռեժիմը պետք է գամվի պատասխանատվության սյունին 2016-ի մարտի 1-ին՝ այն տարում, երբ մենք պետք է դիմավորենք մեր պետական անկախության 25-ամյակը: Պետք է մաքրենք այդ արյունոտ խարանը մեր ճակատից»:
Կարդացեք նաև
Հռիփսիմե ՋԵԲԵՋՅԱՆ
