Փետրվարի 17-ին, ժամը 20.30-ի սահմաններում Տավուշի մարզի Արճիս գյուղի 8-ամյա բնակիչ Վոլոդյա Մարտիրոսյանը ծայրահեղ ծանր վիճակում՝ գիտակցությունը մթագնված, արյան շրջանառության խանգարումներով, շոկի մեջ, տեղափոխվել է Նոյեմբերյանի բժշկական կենտրոն: Արագ կերպով ախտորոշում է կատարվել, պարզվել է, որ տղան ներքին արյունահոսություն ունի: Նոյեմբերյանի բժշկական կենտրոնի տնօրեն, վիրաբույժ Արթուր Գաբրիելյանը շտապ վիրահատություն է կատարել, որի ժամանակ պարզվել է, որ երեխայի փայծաղը պատռված է: Վիրահատությամբ այն հեռացվել է:
Այսօր՝ փետրվարի 19-ին եղանք Նոյեմբերյանի ԲԿ-ում, հանդիպեցինք Վոլոդյա Մարտիրոսյանին: Նա պատմեց, որ հեծանիվ էր քշում, հեծանիվը բախվել է թմբի, ինքն ընկնելով՝ ղեկը հարվածել է կողքին: Ծնողները սկզբում չեն կարծել, որ տղայի հետ լուրջ բան է տեղի ունեցել, ուշացումով են հիվանդանոց հասցրել: Տղայի հայրը՝ Կարեն Մարտիրոսյանն ասաց, որ ինքը գտնվելով հուզված վիճակում՝ սկզբում չի պատկերացրել, թե բժիշկները ինչպիսի գործ են կատարել: Նա իր երախտագիտությունը հայտնեց Նոյեմբերյանի բժշկական կենտրոնի բուժաշխատողներին:
Ի դեպ, փետրվարի 18-ին լրացավ Վոլոդյա Մարտիրոսյանի 8-ամյակը:
Նոյեմբերյանի բժշկական կենտրոնի տնօրենի բուժգծով տեղակալ Աղասի Մահտեսյանից տեղեկացանք, որ 2015թ. հոկտեմբերից Նոյեմբերյանի ԲԿ-ում գործում է 2-րդ վիրահատարան: Այն հնարավորություն է տալիս, հարկ եղած դեպքում, միաժամանակ 2 վիրահատություն կատարել:
Կարդացեք նաև
Ոսկան ՍԱՐԳՍՅԱՆ
