Հայաստանի ազգային գրադարանի շենքում մայիսին նախատեսվում է բացել Գրատպության թանգարան: Այս մասին Aravot.am-ին հայտնեց գրադարանի տնօրեն Տիգրան Զարգարյանը: Թանգարանը ներկայացնելու է 1512թ-ից ստեղծված գրատպության կենտրոնների պատմությունը, ոլորտի երախտավորներին: «Մինչեւ Խորհրդային շրջանը մենք չունեինք պետականություն, եւ մեր տպագրությունը կատարվում էր հիմնականում Եվրոպայում եւ Մերձավոր Արեւելքում»,-ասաց Զարգարյանը:
Նրա խոսքով՝ թանգարանում բացառիկ նմուշներ են ցուցադրվելու. «Աճուրդում ձեռք ենք բերել փայտյա չինական «կլիշեներ», որոնցով չինացիները փայտափորագիր տպագրություն էին անում: Կցուցադրվի նաեւ սեղան-աթոռ-աստիճան՝ երեքը՝ մեկում: Այսինքն, կարող եք աստիճան դարձնել, բարձրանալ՝ գիրք վերցնել, հետո նստել վրան եւ կարդալ: Ունենք նաեւ 100-ամյա տպագրական մեքենա: Այն, ինչը մեզ համար այսօր սովորական է թվում, շատ արագ դառնում է պատմություն: Այդպես, տպագրական հին, մեծ մեքենաները վերացան: Հաջողվեց գտնել երկու այդպիսի մեքենա»:
Լուիզա ՍՈՒՔԻԱՍՅԱՆ
