ԱԺ-ում շարունակվում է տարածքային կառավարման եւ արտակարգ իրավիճակների նախարարությունների բաժանման հարցի քննարկումը:
«Ժառանգության» պատգամավոր Զարուհի Փոստանջյանը ՀՀԿ-ՀՅԴ համագործակցության արդյունքում առաջացած այս իրավիճակը համեմատեց ամուսնության հետ:
Ըստ նրա, ՀՀԿ-ն ամուսնանում է, տունը հարս է բերում եւ տան պայմանները չեն բավարարում, մի սենյակ է առանձնացնում՝ զույգի համար. «Հարս եթե բերում եք, պարզ է, որ գումարներ պետք է ծախսվեն, բայց դա մեր հարկատուների հաշվին է, մեր հաշվին է տեղի ունենում այս կեղծ ամուսնությունները: Ես դեմ եմ քվեարկելու, կոչ եմ անում բոլորին դեմ քվեարկել՝ ցույց տալով, որ մեր՝ հարկատուներիս գումարները իրենց քաղաքական ամուսնությունների համար չենք պատրաստվում վատնել»:
Կարդացեք նաև
«Ժառանգություն» խմբակցության պատգամավոր Թեւան Պողոսյանը հիշել էր գովազդային հայտնի արտահայտությունը՝ կփոխե՞ք մեկը՝ երկուսի հետ: Հիմա ՀՀԿ-ն հարցնում է՝ «Դուք կփոխե՞ք մեկ տարածքային կառավարման եւ արտակարգ իրավիճակների նախարարությունը երկու նախարարությունների հետ: Չեմ ցանկանում մեկը փոխել երկուսի հետ՝ երկու հաշվապահ, երկու աշխատակազմի ղեկավար, այդպես տարբեր երկուներ, գոտիներս պետք է ձգենք»:
Թեւան Պողոսյանն ասաց, որ ինքը դեմ է քվեարկելու նախագծին:
Հռիփսիմե ՋԵԲԵՋՅԱՆ
