«Յուրաքանչյուր փոփոխություն պետք է հստակ տրամաբանված լինի՝ հանուն ինչի է այդ որոշումը կայացվում»,- «Տեսակետ» մամուլի ակումբում այսօր լրագրողների հետ հանդիպման ժամանակ ընդգծեց Հովհաննես Թումանյանի անվան պետական տիկնիկային թատրոնի տնօրեն, գեղարվեստական ղեկավար Ռուբեն Բաբայանը՝ նկատի ունենալով վերջին շրջանում մշակութային մի շարք հաստատություններում տեղի ունեցած փոփոխությունները՝ կրճատումներ, նոր նշանակումներ և այլն:
«Եթե այս կամ այն որոշումը կայացվում է մարդկանց ամբիցիաները բավարարելու համար, հարցականներ են միշտ մնում, իսկ եթե փոփոխություններն արվում են թատրոնի կամ մշակութային մեկ այլ օջախի ստեղծագործական կյանքը բարելավելու, ավելի հետաքրքիր դարձնելու համար, ապա պարզաբանումներ տալը շատ հեշտ է: Մյուս կողմից էլ, ոչ մի արվեստագետ չի կարող ցմահ կպած մնալ ինչ-որ տեղից: Եվ պետք էլ չէ»,- ասաց Ռ. Բաբայանը:
Սակայն բազմաթիվ նշանակումներ, ըստ նրա, պարզապես չեն բացատրվում գործի պահանջներից ելնելով, այլ՝ «ինչ-որ մեկը բարեխոսեց», «ինչ-որ մեկին պետք է աշխատանքի դասավորել» և այլն. «Բայց միշտ որևէ որոշում կայացնելուց առաջ պետք է մտածես նաև հետևանքների մասին,- համոզված է Ռ. Բաբայանը,- որովհետև յուրաքանչյուր արվեստագետ այնքան դրական ու բացասական կողմեր ունի, և ամեն անգամ նշանակումներ անելուց առաջ պետք է մտածել, թե ինչպիսի մթնոլորտ ենք մենք ստեղծում, արդյոք նա կարո՞ղ է իր բոլոր դրական կողմերը դրսևորել»:
Ռ. Բաբայանը կարծում է, որ տաղանդը ցմահ տրված հատկություն չէ, այն հաճախ ժամանակային որոշակի սահմանափակում ունի, հետևաբար՝ տաղանդավոր մարդուն պետք է բարձր գնահատել այն ժամանակ, երբ նա տաղանդավոր է. «Որովհետև հետո կարելի է ուշանալ: Հետո կլինեն կոչումներ, պարգևներ և այլն, բայց դրանք արդեն մեխանիկական ու բովանդակությունից զուրկ գործողություններ կլինեն»:
Կարդացեք նաև
Բաբայանը համոզված է, որ թատրոններում կրճատումների ու նշանակումների հարցը չպետք է մշակույթի նախարարությունը լուծի: Դրանով պետք է զբաղվեն թատրոնը ղեկավարող մարդիկ. «Ես կարծում եմ, որ մեր երկրում չափազանցված է մշակույթի նախարարության դերը: Վերջինս, ըստ իս, պետք է ոչ թե կազմակերպչական, այլ ստրատեգիական հարցերով զբաղվի` օրենքների մշակում, փորձագետների խմբի ձևավորում և այլն: Ես կարծում եմ, որ մշակույթի նախարարությանն ինչքան շատ վերապահվի գերատեսչության դեր, այնքան ավելի շատ դեմ կառնենք նման վիճակների»:
Սիրանուշ ՀԱՅՐԱՊԵՏՅԱՆ
