Այսօր կառավարության առաջարկով ԱԺ-ն արտահերթ նիստ է անցկացնում, որտեղ քննարկվում է մեկ հարց՝ տարածքային կառավարման նախարարությունը արտակարգ իրավիճակների նախարարությունից անջատելը:
ՕԵԿ խմբակցությունը հայտարարեց, որ բոյկոտում են քննարկումը: Մհեր Շահգելդյանի խոսքերով՝ այս քննարկումը արհեստական է, ուստի իրենք չեն մասնակցի եւ դուրս եկավ դահլիճից:
ՀԱԿ խմբակցության ղեկավար Լեւոն Զուրաբյանի համար զարմանալի ու մի քիչ անհասկանալի էր այն հանգամանքը, որ ընդամենը 3 օր հետո պետք է լիագումար նիստ լիներ, բայց կառավարությունը այդպես հրատապ որոշեց հենց այսօր արտահերթ նիստով անցկացնել այս հարցը:
Արդարադատության նախարար Արփինե Հովհաննիսյանը նախագիծը զեկուցելիս ասաց, որ քաղաքական համագործակցության արդյունքում առաջարկվում է ստեղծել երկու նախարարություններ կամ տարանջատել տարածքային կառավարման եւ արտակարգ իրավիճակների նախարարությունները:
Կարդացեք նաև
ԲՀԿ խմբակցության ղեկավար Նաիրա Զոհրաբյանը հիշեցրեց հիմնավորումը, որով միացվել էին նախարարությունները՝ «Երկու կառույցների միաձուլումը կնպաստի բյուջեի միջոցների խնայողությանը եւ արդյունավետ կառավարմանը: Հիմա ինչպես ասացիք՝ քաղաքական համագործակցության անհրաժեշտությամբ պայմանավորված տարանջատում եք երկու կառույցները: Մենք ի՞նչ երաշխիք ունենք, որ քաղաքական համագործակցության անհրաժեշտությամբ չեն տարանջատի սպորտը երիտասարդությունից, գիտությունը կրթությունից: Քանիցս ասվել է, որ մենք պիտի խնայենք բյուջեի միջոցները»:
Հռիփսիմե ՋԵԲԵՋՅԱՆ
