Կառավարությունը պատրաստվում է հերթական վարկը վերցնել, այս անգամ՝ ՀԷՑ-ի չվճարված պարտքերը փակելու համար։
Փաստորեն, պետք է արձանագրենք, որ իշխանությունները հերթական վարկն են վերցնում մասնավոր մի ընկերության կուտակած պարտքերը մարելու համար, իսկ այդ վարկի գումարը հետո պետք է փակեն Հայաստանի քաղաքացիները։ Ընդ որում, ուշադրություն դարձրեք, թե ինչպե՞ս է կուտակվել ՀԷՑ-ի պարտքը (ենթադրում ենք, որ խոսքը ոչ թե 2-3 հազար դոլարի մասին է, այլ գործ ունենք ահռելի պարտքի հետ)։
Զախարյանի խոսքերից հետեւյալ պատկերն է պարզվում՝ ՀԷՑ-ը տարիներ շարունակ ՀԱԷԿ-ի ու Երեւանի ՋԷԿ-ի արտադրած էլեկտրաէներգիան ստացել ու վաճառել է սպառողներին, բնականաբար հավաքել գումարները (ինքներդ գիտեք՝ եթե որեւէ մեկը չվճարի օգտագործած էլեկտրաէներգիայի դիմաց, անմիջապես կհոսանքազրկվի, այնպես որ՝ նրանք բնակիչ բաժանորդներից հավաքել են գումարներն առանց բացառության), բայց ահա ինքը վերցրած հոսանքի դիմաց չի վճարել այդ ընկերություններին կամ վճարել է կիսատ-պռատ։
Իսկ թե ուր են գնացել այդ գումարները՝ որեւէ մեկը չի խոսում այդ մասին։ Դեռ ավելին, ՀԷՑ-ը մի կողմից պարտքեր է կուտակել, մյուս կողմից հասցրել է փոխառություններ տրամադրել «Նաիրիտ»-ին ու «Վանաձոր-Քիմպրոմ»-ին, գործարաններ, որոնք ֆինանսական ծայրահեղ ծանր վիճակում են։
Կարդացեք նաև
Ոնց նայում ենք՝ գործ ունենք կազմակերպված հանցագործության հետ։ Ցանկացած նորմալ իշխանության նման դեպքերում իրավապահներին կհանձնարարեր՝ պարզել կուտակված պարտքի պատճառները եւ հանցակազմի առկայության դեպքում միանգամից քրեական պատասխանատվության ենթարկել մեղավորներին։
Բայց Հայաստանի իշխանությունները, ինչպես հասկանում եք, որեւէ քայլ չեն անում այդ ուղղությամբ, այլ ընդհակառակը՝ իրենք վարկ են վերցնում մասնավոր ընկերության պարտքերը փակելու համար։ Թե ինչո՞ւ՝ կարելի է միայն ենթադրություններ անել (օրինակ՝ իրենք փայ ունեն այս ամենի մեջ)։
Արման ԳԱԼՈՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
