Շատ մարդկանց մոտ հոդային ցավերը դարձել են լուրջ խնդիր: Հոդերի աղային նստվածքների, հոդացավերի դեմ առաջարկվում է 5 գրամ դափնետերեւները լցնել 300 միլիգրամ ջրի մեջ ու եռացնել 5 րոպե, որից հետո թերմոսում թրմել: Լուծույթը լցնել բաժակի մեջ ու խմել փոքր կումերով` 12 ժամվա ընթացքում (ամբողջությամբ չի կարելի): Ընդունել 3 օր անընդմեջ: 1 շաբաթ ընդմիջում տալ, ապա նորից կրկնել մինչեւ ապաքինվելը:
Հոդացավերի դեպքում խորհուրդ է տրվում վերցնել 50 գրամ կամֆորա, 50 գրամ մանանեխի փոշի, 100 միլիգրամ սպիրտ եւ նույնքան ձվի սպիտակուց: Բաժակի մեջ լցնել սպիրտը, դրանում լուծել` սկզբում կամֆորան, ապա մանանեխի փոշին: Ձվի սպիտակուցն առանձին լավ հարել, խառնել նախորդ զանգվածին: Գիշերը քնելուց առաջ այդ մածուկով տրորել ցավող հոդերը այնպես, որ քսուքը չչորանա: Ապա թեթեւակի սրբել խոնավ կտորով:
Ռեւմատիկ ցավերի, հոդերի մրսածության դեպքում խորհուրդ է տրվում ցավազրկող, հանգստացնող հետեւյալ միջոցը. դափնու տերեւները` 6 բաժին, 1 բաժին գիհու ասեղնափշերը 12 բաժին կարագի հետ լավ տրորել: Այս քսուքը ունի անմիջական ազդեցության հատկություն:
Ժողովրդական բժշկությունը ռադիկուլիտի բուժման արդյունավետ միջոց նշում է հետեւյալ դեղատոմսը. մաքուր լվացած թարմ ձուն դնել քացախահյութի մեջ, ապակե անոթում: Երեք օր հետո, երբ կճեպն իսպառ լուծվում է, եւ միջուկը պնդացած է լինում խաշած ձվի պես, հանել լուծույթի միջից, թաղանթը հեռացնել եւ տրորել: Վրան ավելացնել 1-2 ճաշի գդալ արեւածաղկի յուղ, լավ շաղախել եւ ստացված մածուկը նորից լցնել ամանում մնացած քացախալուծույթի մեջ: Լավ խառնելուց հետո լցնել շշի մեջ, ամուր խցանել եւ պահել մութ տեղում` սենյակային ջերմաստիճանի տակ:
Ռադիկուլիտի սրման ժամանակ այս դեղանյութը շշում լավ հարելուց հետո գիշերը քսել ցավոտ տեղին, մեջքը փաթաթել բրդե շալով եւ վրան ջեռակ դնել:
Բայց չպետք է մոռանալ, որ ցանկացած բուժում սկսելուց առաջ պետք է խորհրդակցել բժշկի հետ, պարզել բուն պատճառը:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
18.02.2016
