ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանը փետրվարի 17-ին հանդիպել է Հայաստանում ԱՄՆ արտակարգ եւ լիազոր դեսպան Ռիչարդ Միլսի հետ:
Ողջունելով դեսպանին՝ Կորյուն Նահապետյանը շնորհավորել է նրան Հայաստանում մեկամյա դիվանագիտական առաքելության կապակցությամբ: Նա ընդգծել է, որ հայ-ամերիկյան հարաբերությունները զարգանում են կառուցողական հունով, նոր որակով եւ ընդգրկում են բազմաթիվ ուղղություններ:
Պաշտպանության ոլորտում համագործակցության ձեռքբերումներից հանձնաժողովի նախագահը մատնանշել է հայկական խաղաղապահ բրիգադի կայացումը, հումանիտար ականազերծման եւ փորձագիտական կենտրոնի ստեղծումը, պաշտպանության ռազմավարական վերանայման գործընթացին ԱՄՆ խորհրդատվական աջակցությունը, «Միջազգային ռազմական կրթություն եւ վարժանք» ծրագրի շրջանակում շարունակվող համագործակցությունը: Նա բարձր է գնահատել ԱՄՆ-ի դերը Հայաստանի խաղաղապահ կարողությունների ստեղծման եւ զարգացման գործում՝ արժեւորելով գործընկերների հետ Հայաստանի մասնակցությունը խաղաղապահ գործողություններին եւ միջազգային անվտանգության ապահովմանը:
Կորյուն Նահապետյանը կարեւորել է նաեւ ամերիկյան կողմի աջակցությունը Հայաստանի սահմանային անվտանգության համակարգի ամրապնդմանը: Դեսպան Ռիչարդ Միլսն ընդգծել է, որ միջազգային անվտանգության ոլորտում Ամերիկայի Միացյալ Նահանգների եւ Հայաստանի գործընկերությունը շարունակում է մնալ երկկողմ հարաբերությունների առավել դինամիկ կողմերից մեկը: Նրա խոսքով՝ իր երկիրը բարձր է գնահատում Հայաստանի ներդրումը բազմակողմ ռազմական ու խաղաղապահ գործողություններում՝ Կոսովոյում, Աֆղանստանում, Լիբանանում եւ մոտ ապագայում, թերեւս, նաեւ Մալիում:
Կարդացեք նաև
Հանձնաժողովի նախագահն անդրադարձել է նաեւ սահմանադրական բարեփոխումների հետագա ընթացքին՝ ընդգծելով, որ անցումային այս ժամանակաշրջանում հետեւողական աշխատանք է իրականացվելու նոր քաղաքական եւ իրավական համակարգ ձեւավորելու համար: Կարեւորվել է ԱԺ պաշտպանության, ազգային անվտանգության եւ ներքին գործերի մշտական հանձնաժողովի եւ ԱՄՆ Կոնգրեսի Ներկայացուցիչների պալատի համապատասխան հանձնաժողովների միջեւ հնարավոր համագործակցությունը: Դեսպանը պատրաստակամություն է հայտնել նպաստելու խորհրդարանական հարաբերությունների ամրապնդմանը:
Հանդիպման ընթացքում կողմերն անդրադարձել են Լեռնային Ղարաբաղի հակամարտության կարգավորմանը: Կորյուն Նահապետյանն արձանագրել է, որ ՀՀ իշխանությունները բանակցային գործընթացում մշտապես ցուցաբերում են կառուցողական մոտեցում: «Մեր ձգտումն է տարածաշրջանում ունենալ հարատեւ խաղաղություն»,- ընդգծել է նա: ԱՄՆ դեսպանը ողջունել է այն փաստը, որ Հայաստանի իշխանությունները պատրաստակամ են աջակցելու սահմանային միջադեպերի հետաքննության մեխանիզմների ստեղծմանը: Նա նշել է, որ ԼՂ հիմնախնդրի կարգավորումը վերապահված է ԵԱՀԿ Մինսկի խմբին, եւ կողմերը պետք է պատրաստ լինեն բանակցելու:
Հանդիպման ժամանակ անդրադարձ է եղել նաեւ Իրանի նկատմամբ պատժամիջոցների վերացման արդյունքում տարածաշրջանում նոր հնարավորությունների եւ հեռանկարների ստեղծմանը, սիրիական ճգնաժամի հետեւանքով Հայաստանում ապաստանած բազմաթիվ փախստականների խնդիրներին:
Ազգային ժողովի մամուլի հաղորդագրություն
