Ավան եւ Նոր Նորք վարչական շրջանների ընդհանուր իրավասության առաջին ատյանի դատարանում դատավոր Դավիթ Հարությունյանի նախագահությամբ այսօր պետք է շարունակվեր Վազգեն Սարգսյանի անվան ռազմական ինստիտուտում սպանված կուրսանտ Հայկազ Բարսեղյանի գործի քննությունը:
Նիստի ընթացքում պետք է հարցաքննվեր դատաբժշկական փորձագետ Վիգեն Ադամյանը: Ժամանակացույցով նիստը պետք է տեղի ունենար ժամը 13:00-ին: Սակայն 13:00-ից որոշ ժամանակ անց դատական կարգադրիչները տեղեկացրեցին, որ դատական նիստ տեղի չի ունենալու:
Դատավորի օգնականը լրագրողներին տեղեկացրեց, որ դատական նիստը հետաձգվել է դատաբժշկի բացակայության պատճառով:
Հիշեցնենք, որ Գնել Թևոսյանին, Նորիկ Սահակյանին,Վաչե Սահակյանին և Մովսես Ազարյանին մեղադրանք է առաջադրվել այն բանի համար, որ նրանք 2015թ. հունվարի 29-ին ՀՀ ՊՆ 24236 զորամասում խուլիգանական դրդումներով սպանել են Հայկազ Արկադիի Բարսեղյանին:
Կարդացեք նաև
Իսկ Վարազդատ Սաֆարյանին մեղադրանք է առաջադրվել այն բանի համար, որ 2014թ. նոյեմբերի 16-ին կուրսանտ Տ.Մանասերյանին շարքում խոսելու համար դիտողություն անելուց և վերջինիս կողմից հակադարձում ստանալուց հետո, Վաչե Սահակյանի, Մովսես Ազարյանի հետ միասին, մի խումբ անձանցով ծեծի են ենթարկել Մանասերյանին, բացի այդ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:
Աշոտ ԻՍՐԱԵԼՅԱՆ
