Այսօր Երեւանում եւ հանրապետության մի շարք շրջաններում «Հիդրոմետ» ծառայության կողմից կանխատեսվում է ռեկորդային բարձր ջերմաստիճան։ Մասնավորապես Երեւանում կանխատեսվում է +16…+18 աստիճան տաքություն։
«Փետրվարի 15-ից հանրապետության տարածք ներթափանցած հարավային տաք օդային հոսանքները առաջ բերեցին օդի ջերմաստիճանի էականորեն բարձրացում։ Ամենաբարձր ջերմաստիճանը գրանցվեց Բագրատաշենում՝ +22, Իջեւանում՝ +20, Դիլիջանում՝ +19, Կապանում +18, Արարատյան դաշտում՝ +15…+16, Երեւանում՝ +15։ Ներկա պահին օդի ջերմաստիճանի բարձրացումը շարունակվում է։ Երեկվա հետ համեմատած եղանակը այսօր տաքացել է եւս 3-4 աստիճանով։ Փետրվարի 18- ին Երեւանում կանխատեսված է +16…+18 աստիճան տաքություն, որի արդարացման դեպքում կգրանցվի ջերմաստիճանային ռեկորդ, մինչեւ այսօր այդ ռեկորդը 1979 թվականի փետրվարի 18-ն է, երբ Երեւանում գրանցվել է +14…+15 աստիճան տաքություն»,- մանրամասնեց ՀՀ տարածքային կառավարման եւ արտակարգ իրավիճակների նախարարության «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը։
Նրա փոխանցմամբ՝ երեկ օդի օրական միջին ջերմաստիճանը հանրապետության տարածքում կլիմայական նորմայից բարձր էր 8-13 աստիճանով։
Չնայած սրան, առաջիկա օրերին ջերմաստիճանը կնվազի։ Փետրվարի 19-ին Լոռիում, Տավուշում, Սյունիքում եւ Արցախում սպասվում է ջերմաստիճանի 8-10 աստիճանով նվազում, իսկ մյուս շրջաններում՝ 4-5 աստիճանով։ Ջերմաստիճանի նվազմանը զուգահեռ սպասվում են նաեւ տեղումներ:
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
