Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում փետրվարի 17-ին դատավոր Էդիկ Ավետիսյանի նախագահությամբ շարունակվում էր «Լոկալ դեվելոփըրզ» ՍՊԸ-ն ընդդեմ «Դոլմամա» ռեստորանի հիմնադիր Ժիրայր Ավանյանի 3-րդ գործի քննությունը:
Ինչպես երեքշաբթի տեղի ունեցած դատական նիստի ընթացքում, այնպես էլ այսօր Ժիրայր Ավանյանի ներկայացուցիչ Տիգրան Աթանեսյանը միջնորդեց, որպեսզի կրկնակի փորձաքննություն նշանակվի եւ 3 գործերը 1 վարույթում միանան: Նա նաեւ միջնորդեց որպես երրորդ անձ ներգրավել «Դոլմամա» ՍՊԸ-ին. «Նշված տարածքի նկատմամբ գրանցված է անհատույց օգտագործման իրավունք «Դոլմամա» սահմանափակ պատասխանատվությամբ ընկերության անունով, գրանցված է 2004 թվականին, տրված է համապատասխան վկայական 99 տարով՝ համաձայն նոտարի կողմից վավերացած պայմանագրի: Այսինքն՝ օրենքով նախատեսված է, որ ամբողջ ընթացակարգը պահպանվել է: Նման պայմաններում ակնհայտ է, որ «Դոլմամա» սահմանափակ պատասխանատվությամբ ընկերությունը եւս ունի իր շահը»:
«Լոկալ դեվելոփըրզ» ՍՊԸ ներկայացուցիչ Ալեքսանդր Սիրունյանը հայտարարեց, որ չի առարկում, կողմը համարում է, որ անհրաժեշտ է գործերը միացնել 1 վարույթում: Սակայն, փորձաքննություն նշանակելու միջնորդությանը առարկում են, քանի որ գործը դատաքննության փուլում է, եւ պատասխանող կողմը չի հիմնավորել, թե ինչով է պայմանավորված ժամանակին ապացույցներ չներկայացնելը: Իսկ երրորդ միջնորդությունը թողեց դատարանի հայեցողությանը:
Միջնորդությունների կապակցությամբ դատական նիստը հետաձգվեց:
Կարդացեք նաև
Ամի ՉԻՉԱԿՅԱՆ
