«ՀՀԿ-ականների տեղը ես էլ շատ երկար կմտածեի»,- այսօր «Փաստարկ» ակումբում այսպես արձագանքեց ՀԱԿ խորհրդարանական խմբակցության ղեկավար Լեւոն Զուրաբյանը` արձագանքելով հարցին` իր կարծիքով ինչո՞ւ է ձգձգվում ՀՀԿ-ՀՅԴ համագործակցության շուրջ համաձայնությունը:
«Մի լավ, բարի խորհուրդ տամ ՀՀԿ-ականներին, թեեւ լավ կլինի, որ դրանից չօգտվեն` կնպաստի ռեժիմի արագ հեռացմանը»,-շարունակեց Լեւոն Զուրաբյանը` հիշեցնելով, որ ՀՅԴ-ն բազմամյա կուսակցություն է, պատմություն շատ է տեսել եւ դա ցույց է տվել մի բան. «ՀՅԴ-ի հետ դաշնակցել են ուժեր, որոնք կործանարար դերակատարում են ունեցել մարդկության պատմության համար, իրենք էլ կործանվել են»:
Նա օրինակներ էլ բերեց`դաշնակներն օգնեցին երիտթուրքերին` իշխանության գալ, երբ սուլթանը հետապնդում էր նրանց. «Հերիք չի ահավոր պատուհաս ու ողբերգություն բերեց մեր ժողովրդի գլխին` ինքն էլ կործանվեց»: Ապա նացիստական Գերմանիայի հետ Դաշնակցության համագործակցությունը:
«Միգուցե ՀՀԿ-ից ազատվելու ձեւը սա՞ է»,- տարակուսեց ՀԱԿ-ական գործիչը, այնուհանդերձ, ՀՀԿ-ականներին խորհուրդ տալով. «Եթե ուզում են սաղ մնան, թող ՀՅԴ-ի հետ չդաշնակցեն»:
Կարդացեք նաև
Aravot.am-ի հարցին`երբ մի քանի տարի առաջ ՀԱԿ-ը դաշնակցում էր ՀՅԴ-ի հետ`քառյակի շրջանակներում, պատմությունը չէ՞ր հիշում, Լեւոն Զուրաբյանը հակադարձեց. «Քառյակը դաշինք չի եղել, եղել է խորհրդարանական համագործակցություն որոշ պահանջների շուրջ` կենսաթոշակների ծրագրի, ավելացված արժեքի հարկի նվազեցման եւ այլն: Եռյակը արդեն դաշինք էր»:
Նելլի ԳՐԻԳՈՐՅԱՆ
