Մեկ տարի առաջ Դուք ինձ վերադարձրիք Կամերային երաժշտական թատրոն՝ առաջարկելով վերականգնել երբեմնի երաժշտականը, խոստանալով օգնել բոլոր հարցերում։ Որպես ստեղծագործող արվեստագետ՝ ես, իհարկե, տրվեցի այդ գայթակղությանը։
Սակայն գավառական ճաշակով այդ թատրոնում, որի «աստղերը» էժանագին տխրահռչակ սերիալների ճանաչված հերոսներն են, փոխել որեւէ բան, արդեն հնարավոր չէր: Թատերախումբ կոչվող այդ անձնակազմը սովոր չէ ինտենսիվ եւ ռեժիմով աշխատելաոճին։
Ս.թ. հունվարի 26-ին Ձեզ ուղղված իմ բաց նամակում թատրոնում ստեղծված Ձեր դրածո տնօրենի կողմից բեմադրված իրավիճակից դուրս գալու համար ես խնդրեցի հայտարարել մրցույթ։ Դա կտար հնարավորություն թատրոն վերադարձնել տնօրենի կողմից հեռացված դերասաններին, շնորհալի ուժերի, որոնց հետ վերջին տարում բավական աշխատանքներ էին տարվել առաջիկա երաժշտական բեմադրությունների համար։ Այդ նամակին Դուք պատասխանեցիք թվացյալ փոխհամաձայնությամբ, այն է՝ երաժշտական թատրոնում բեմադրել դրամատիկ ներկայացում՝ հիմնական կազմի հետ եւ երաժշտական ներկայացում՝ իմ կողմից հրավիրյալ դերասանների հետ։ Ոչ ռացիոնալ Ձեր այս որոշումը ես համարում եմ դեպի փակուղի տանող ճանապարհ։ Կարծում եմ՝ նման քաղաքականության հետեւանք է նաեւ Օպերային թատրոնի ներկայիս իրավիճակը։
Ես հեռանում եմ Երաժշտական կամերային թատրոնից։ Ցավում եմ, որ թատրոնը կոմայից դուրս բերելու իմ մեծ ցանկությունը չիրագործվեց։
ԱՐՄԵՆ ՄԵԼԻՔՍԵԹՅԱՆ
Կարդացեք նաև
Ռեժիսոր, ՀՀ արվեստի վաստակավոր գործիչ, պրոֆեսոր
«Առավոտ» օրաթերթ
16.02.2016
Պարոն Մելիքսեթյան , այս երկրին բանիմաց ,բարձրաճաշակ և բառիս բուն իմաստով գերազանց մասնագետներ պետք չեն, մեր բարձրաստիճան այրերն իրենց կողքին պահում են իրենց մակարդակի մարդկանց , որպեսզի էլ ավելի ակնառու չլինի վերջիններիս տգիտությունն ու անճաշակությունը: Ցավում եմ թատրոնի մասնագիտական կորստի համար , բայց միևնույն ժամանակ շնորհավորում եմ Ձեզ նման լպրծուններից պրծնելու կապակցությամբ: