Համաձայն գիտնականների տվյալների՝ յուրաքանչյուր տարի ամբողջ աշխարհում քաղցկեղից մահանում է շուրջ հինգ միլիոն մարդ (մոտ ինը միլիոն հիվանդներից)։
Այդ իսկ պատճառով սույն հիվանդության կանխարգելմանն ուղղված քայլերն անչափ կարեւոր են յուրաքանչյուրի համար։
Հրաչուհի Գրիգորյանի եւ Սուսաննա Լաչիկյանի կազմած «365 օգտակար խորհուրդ» գրքում նշվում է, որ օրգանիզմում E եւ B6 վիտամինների անբավարարությունն այն դարձնում է քաղցկեղածին նյութերի ներգործության նկատմամբ առավել զգայուն, ուստի անհրաժեշտ է հետեւել, որպեսզի այդ վիտամինները մշտապես լինեն մեր ամենօրյա սննդակարգում։
Ուռուցքաբաններն ապացուցել են, որ սննդի կալորիականության նվազեցումը դանդաղեցնում է ուռուցքի աճը։ Ուստի ընդամենը բուսական սննդակարգին անցնելով՝ կարելի է կանխարգելել օրգանիզմում ուռուցքի առաջացումը։
Կարդացեք նաև
Համաձայն ուռուցքաբանների տվյալների՝ բուսական հում սննդամթերքները ունեն հակաուռուցքային հատկություններ։ Այդ սննդամթերքների թաղանթանյութերը կարգավորում են աղիների միկրոֆլորան, իսկ առողջ միկրոֆլորան արտադրում է այնպիսի նյութեր, որոնք ուժեղացնում են հակաքաղցկեղային պաշտպանությունը։
Տնային տնտեսուհիներին խորհուրդ է տրվում, որ ձմռան համար աղ դրած թարմ կանաչեղեն պահածոյացնել չի կարելի, երկարաժամկետ պահպանման դեպքում այդ պահածոյի մեջ գոյանում են քացկեղածին նյութեր։ Լավ է կանաչեղենը չորացնել (ինչպես անում էին մեր տատիկները) եւ պահպանել բամբակյա կամ քաթանե տոպրակներում։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
16.02.2016
