Հայաստանի ներքաղաքական կյանքում լուրջ տեղաշարժեր չեն նկատվում: Ինչպես այսօր «Տեսակետ» ակումբում ասաց քաղաքագետ Ալեքսանդր Իսկանդարյանը, արդեն սկսվել են 2017թ. խորհրդարանական ընտրությունների նախապատրաստական աշխատանքները. «ՀՀԿ-ՀՅԴ կոալիցիա ստեղծելու փորձերն այդ մասին են խոսում: Կարծում եմ՝ առաջիկայում հետաքրքիր է լինելու»:
Անդրադառնալով Ադրբեջանին՝ Իսկանդարյանը նշեց, որ ընդամենը կես տարի առաջ իրավիճակն այդ երկրում բոլորովին այլ էր. «Հիմա Ադրբեջանը սահմանափակ ռեսուրսներ ունի եւ դժվար է ներազդում ավանդական մեթոդներով: Մարդու իրավունքների ոտնահարման համար այդ երկիրը անընդհատ միջազգային կառույցների քննադատությանն է արժանանում»:
Ալեքսանդր Իսկանդարյանը կարծում է, որ Հայաստանի եւ Ադրբեջանի միջեւ ներկայումս պատերազմի հավանականություն չկա. «Սահմանին սրացումներ միանշանակ կլինեն: Ադրբեջանը ռացիոնալ պատճառներ ունի դիվերսիաներ իրականացնելու, բայց չի նշանակում, որ միշտ այդպես է լինելու: Իսկ թե ապագայում ինչ կլինի, չեմ կարող ասել, ես Նոստրադամուսը չեմ»:
Բանախոսը նաեւ փաստեց, որ ԵՄ-ում եւս ճգնաժամ է, միգրացիոն խնդրի պատճառով եվրոպական երկրները մեծ հարվածներ են կրում. «Տնտեսական ճգնաժամը եւս խորանում է: Հարավային Կովկասում, Մերձավոր Արեւելքում խնդիրներ կան: Մասնավորապես՝ Մերձավոր Արեւելքը մահացել է, նորն էլ չի ծնվել: Այս ամենի ֆոնին կայուն վիճակում է միայն Հայաստանը: Տնտեսական վիճակը վատ է, բայց կայուն: Պետք է ուշադիր հետեւենք հարեւան երկրներում տեղի ունեցող իրադարձություններին, չանենք կտրուկ քայլեր եւ պահպանենք մեր կայուն վիճակը»:
Կարդացեք նաև
Լուիզա ՍՈՒՔԻԱՍՅԱՆ
