ՆԱՏՕ-ն պաշտպանում է ԵԱՀԿ Մինսկի խմբի ջանքերը Լեռնային Ղարաբաղի հակամարտության կարգավորման ուղղությամբ: Այս մասին, ինչպես հաղորդում է Trend-ը, Բաքվում լրագրողների հետ հանդիպմանն ասել է ՆԱՏՕ-ի գլխավոր քարտուղարի՝ Հարավային Կովկասի և Կենտրոնական Ասիայի հարցերով հատուկ ներկայացուցիչ Ջեյմս Ափաթուրայը:
«Դաշինքն ուղղակիորեն ներգրավված չէ Լեռնային Ղարաբաղի հակամարտության կարգավորման գործընթացում, բայց մեր դիրքորոշումն այն է, որ մենք աջակցում ենք ԵԱՀԿ ՄԽ ջանքերին և հակամարտության խաղաղ կարգավորմանը»,- ասել է Ափաթուրայը:
Նրա խոսքով՝ ՆԱՏՕ-ում անհանգստացած են զորքերի շփման գծում իրավիճակի լարվածությամբ: «Մենք հակամարտության կողմերին կոչ ենք անում աշխատել խաղաղ կարգավորման ուղղությամբ: ՆԱՏՕ-ի երկու անդամ-երկրները նաև ԵԱՀԿ ՄԽ անդամներ են: Կազմակերպության պաշտոնական դիրքորոշումն է՝ աջակցել ԵԱՀԿ ՄԽ-ին և հակամարտության խաղաղ կարգավորմանը»,- ասել է Ափաթուրայը:
Պատրաստեց՝ Վիկտորյա ԱՆԴՐԵԱՍՅԱՆԸ
