«Քննարկում էինք, թե նոր Սահմանադրության կարգավորումների համատեքստում ինչպիսի՞ գործունեություն պիտի ծավալի Մարդու իրավունքների պաշտպանը եւ, ընդհանրապես, ինչպիսին պիտի լինի նրա դերը: Գիտեք, որ հանձնաժողովում էլ քննարկվեց գործառույթների իրականացման հարցերը եւ հայեցակարգային այլ հարցեր»,-լրագրողների հետ զրույցում ասաց ՄԻՊ-ի թեկնածու Արման Թաթոյանը: Նա այսօր խորհրդարանում հանդիպեց ՀՀԿ եւ ՀՅԴ խմբակցությունների ներկայացուցիչների հետ:
«Կարեւորում եմ այս քննարկումը, քանի որ հիմնական շեշտադրումը դրված էր անհատական եւ կանխարգելիչ գործունեության տեսակները զուգակցելու, կառուցողական աշխատելու վրա»,- մանրամասնեց Արման Թաթոյանը:
ՕԵԿ եւ «Ժառանգություն» խմբակցությունների հետ նախնական պայմանավորվածություն կա հանդիպելու, ՀԱԿ-ի հետ պայմանավորվածությունից, թեկնածուն տեղյակ չէր: Թեկնածուի հանդիպումները ԱԺ խմբակցությունների հետ, հավանաբար, վաղը կշարունակվեն:
Այլ մանրամասները` տեսանյութում
Կարդացեք նաև
ՀՅԴ-ում չեն կիսում տեսակետը, որ գալով պետական գերատեսչությունից, Արման Թաթոյանը չի կարող անաչառ լինել: Խմբակցության անդամ Արծվիկ Մինասյանն ասաց, որ հայեցակարգային մակարդակով Արման Թաթոյանի մոտեցումները համընկնում են ՀՅԴ-ի մոտեցումներին: «Վստահ ենք, որ եթե աջակցությունը նաեւ պառլամենտի կողմից լինի, Արման Թաթոյանը կկարողանա իրացնել այն բոլոր գործառույթները, որոնք նախատեսված են սահմանադրական փոփոխություններով»,- ասաց նա` հավելելով, որ ՀՅԴ խմբակցության հինգ անդամներն այդ աջակցությունը կցուցաբերեն Արման Թաթոյանին:
Նելլի ԳՐԻԳՈՐՅԱՆ
