«Ռուս թուրքական հարաբերությունները կայուն վիճակում չեն, առաջիկայում գուցե ավելի վատթարանան՝ սիրիական ճգնաժամի հետեւանքով»,-այսօր «Տեսակետ» մամուլի ակումբում նման կարծիք հայտնեց քաղաքագետ Ալեքսանդր Իսկանդարյանը: Նա նշեց, որ Սիրիայում ռազմական գործողությունները հետաքրքիր պլանով են զարգանում. «Այդ մարտերը Թուրքիայի հետաքրքրությունների շրջանակում են: Բախվում են տարբեր ուժեր, այդ թվում՝ թուրքական: Թուրքիան փորձում է այդ ամենի մեջ ներքաշել ՆԱՏՕ-ին: Աստիճանաբար քրդերի եւ Ասադի զորքերի կողմից փակվում են Թուրքիայից Սիրիա ահաբեկիչներին զենք ու զինամթերք մատակարարելու ուղիները»:
Քաղաքագետի բնորոշմամբ՝ Թուրքիան ներքին քաղաքական ճգնաժամի մեջ է եւ հարեւանների հետ խնդիրներ ունի. «Բարդ են հարաբերությունները Բուլղարիայի, Հունաստանի, Եվրամիության հետ, Սիրիայի մասին էլ լռում եմ: Թուրքիայի հարավում պատերազմ է ընթանում, իսկ դա մեր սահմանի մոտ է, այսինքն՝ մեզանից մի քանի տասնյակ կիլոմետր այն կողմ»:
Իսկանդարյանը նաեւ կարծիք հայտնեց, որ ռուս-թուրքական հարաբերությունների վատթարացումը Հայաստանին ոչնչով չի սպառնում. «Որոշ քաղաքագետներ կասեն՝ վույ աման, վույ աման՝ Ռուսաստանն ու Թուրքիան մեզ կկիսեն իրար մեջ…Բայց պետք չէ էմոցիոնալ դատողություններ անել»:
Կարդացեք նաև
Լուիզա ՍՈՒՔԻԱՍՅԱՆ
