«Ընտրական ցուցակներում հիմնական խնդիրներից էր ուռճացված լինելը։ Բնակչությունը փաստորեն նվազել է, բայց աճել է ընտրողների թիվը։ Ոստիկանությունը, բնականաբար, պարզաբանում է ներկայացնում, թե իրենք իրավունք չունեն ընտրողներին, որոնք գտնվում են Հայաստանից դուրս, հանել ցուցակներից։ Բայց սա շատ մեծ ռեսուրս է բազմակի քվեարկության համար»,- այս մասին «Մեդիա կենտրոնում» հայտարարեց Թրանսփարենսի Ինթերնեյշնլ հակակոռուպցիոն կենտրոնի գործադիր տնօրեն Վարուժան Հոկտանյանը։
Նա մասնավորապես ներկայացնում էր անցած տարվա դեկտեմբերի 6-ին Հայաստանում կայացած Սահմանադրական հանրաքվեի ընտրական թվերի մոնիտորինգի ամփոփիչ արդյունքները։ «Ստացվում է, որ Հայաստանի մշտական բնակչության 85%-ն ընտրացուցակներում է։ Դա պաշտոնական տվյալներով։ Իսկ իրականում դեմոգրաֆիական ցուցանիշները 70-72%-ի շրջանում են ցույց տալիս այդ թիվը»։
Ներկայացնելով հանրաքվեի հետ կապված մյուս խնդիրը, Վարուժան Հոկտանյանը նշեց, որ կային հասցեներ, որտեղ բավականին մեծ թվով ընտրողներ էին գրանցված . «13 հասցե կար, որտեղ 100-ից ավելի ընտրողներ կային։ 10.400 հասցեներում էլ 10-ից ավելի ընտրողներ կային։ Ոստիկանությունը պարզաբանեց, թե դրանք ծերանոցներ էին։ Մեր ասածն այն է, որ պետք է գնալ եւ տեսնել, թե իսկապե՞ս այնտեղ 100 ընտրող կա, թե ոչ»։
Ըստ Թրանսփարենսի Ինթերնեյշնլ հակակոռուպցիոն կենտրոնի գործադիր տնօրենի՝ 2015 թվականի հունվարի 1-ի դրությամբ, Ազգային վիճակագրական ծառայության տվյալներով, Հայաստանում մշտական բնակություն ունեն 219.200 65 տարեկան եւ ավելի մեծ անձինք. «Իսկ ընտրացուցակներում ներառված էին 370.278 ընտրող»։
Կարդացեք նաև
Աշոտ ԻՍՐԱԵԼՅԱՆ
Լուսանկարը՝ «Մեդիա» կենտրոնի
