«Թատրոնում մի բեւեռ են ստեղծել, որը տնօրենն է, իսկ գեղարվեստական ղեկավարը չի մասնակցում որեւէ գործի: Եթե ուզում եք թատրոնն ապրի, գլխավոր ռեժիսորը պետք է պետության կողմից հովանավորություն ունենա»,-այսօր «Տեսակետ» մամուլի ակումբում խոսելով «Թատրոնի մասին օրենքի» անհրաժեշտության մասին, ասաց Սոս Սարգսյանի անվան Համազգային պետական թատրոնի գեղարվեստական ղեկավար Հրաչյա Գասպարյանը:
Նրա համոզմամբ՝ թատրոնի տնօրենը չպետք է նշանակի գլխավոր ռեժիսորին. «Հատկապես մարզերում այդ խնդրի պատճառով թատրոնի լինել-չլինելու հարցն է դրվում: Մարզերում տնօրենները թատրոն են պահում այնպես, ինչպես հարմար է: Իսկ եթե գեղարվեստական ղեկավարը կամ գլխավոր ռեժիսորն էլ նույն լիազորությունն ունենան, ինչ տնօրենները, ամեն մեկն իր գործով կզբաղվի: Եթե գլխավոր ռեժիսորի գործով զբաղվում է տնօրենը, թատրոնը կմեռնի»:
Գասպարյանի բնորոշմամբ՝ տնօրենները պրոդյուսերներ չեն եւ գումար չեն հայթայթում թատրոնի գոյությունն ապահովելու համար. «Պետությունից գումար վերցնող տնօրենը պրոդյուսեր չէ, այլ հաշվապահ»:
Բանախոսի դիտարկմամբ՝ «Թատրոնի մասին օրենքի» ընդունման դեպքում հնարավոր կլինի կարգավորել տնօրեն-գլխավոր ռեժիսոր հարաբերությունները:
Կարդացեք նաև
Լուիզա ՍՈՒՔԻԱՍՅԱՆ
