Սյունիքի մարզի Տանձատափ գյուղը 8 համայնքներից մեկն է, որոնք համայնքների խոշորացման ծրագրի շրջանակներում միանալով կազմեցին Տաթեւ բազմաբնակավայր համայնքը: Տանձատափը 8 համայնքներից բնակիչների թվով 7-րդն է, այնտեղ պաշտոնական տվյալներով բնակվում է 69 բնակիչ:
Տարվա այս եղանակին Տանձատափ հասնելու միակ եղանակը «Նիվա» մակնիշի մեքենաներն են: Դրանով է պայմանավորված՝ համայնքի բնակիչների «սերը» դեպի «ՎԱԶ 2121» մակնիշի մեքենաները:
Տանձատափ հասնելիս առաջինը աչք է ծակում գյուղապետարանի վարդագույն շենքը, սակայն Տանձատափի արդեն նախկին գյուղապետ Ռոբերտ Մուշեղյանը այն «Սպիտակ տուն» է անվանում: Համայնքի բնակիչները հիմնականում իրենց ժամանակն անցկացնում են «Սպիտակ տան» բակում, որտեղ գտնվում է նաեւ մշակույթի տունը, գրադարանը, հանդիսությունների սրահը:
Կարդացեք նաև
Չնայած, որ Տանձատափում ապրում է ընդամենը 10 դպրոցական եւ 1 նախադպրոցական տարիքի երեխա, համայնքում մանկական շունչը զգացվում է:
Տանձատափի բնակիչները իրենց գյուղը համարում են ամենագեղեցիկը, բայց չնայած դրան վստահ են, որ գյուղն արդեն մահացած է. գյուղի հիմնական դպրոցն ավարտելուց հետո երիտասարդները հիմնականում Կապանում են շարունակում իրենց կրթությունը եւ հենց այնտեղ էլ հաստատվում են:
Բացի կտրված լինելուց, տանձատափցիներին անհանգստացնում է մեկ խնդիր եւս՝ գյուղի ճանապարհները:
Ամի ՉԻՉԱԿՅԱՆ
