Նախագահ Սերժ Սարգսյանը հայտարարում է, որ մեր հակառակորդների հակահայ քաղաքականությունը ֆիասկո է ապրում. «Թուրքիայի եւ Ադրբեջանի իշխանությունների դիրքորոշումը շատ լավ գիտենք բոլորս եւ գիտենք վաղուց: Սակայն փաստն այն է, որ տարիներ շարունակ նրանց իրականացրած քաղաքականությունն այն արդյունքը չի տվել, որ իրենք կցանկանային տեսնել:
Նրանք մեզ հետ փորձել են խոսել սպառնալիքի, պարտադրանքի եւ ուժի դիրքերից: Այդ ձեւով մեզ հետ խոսելն անհեռանկար է եւ որեւէ արդյունք չի տալու, ինչպես չի տվել մինչեւ այսօր»:
ԼՂՀ նախագահի մամուլի խոսնակ ԴԱՎԻԹ ԲԱԲԱՅԱՆԸ, ի հավելում Հայաստանի նախագահի խոսքի, նկատեց, թե Ադրբեջանը հայտնվել է շատ ծանր տնտեսական իրավիճակում. «Նավթ արտահանող երկրում վառելիքի գներն այնպիսի աճ են գրանցել, ինչն անգամ անհավանական է թվում: Սրան զուգահեռ, կոռուպցիան հասել է աննախադեպ չափերի, պետությունն անկարող է դրան դիմակայել»:
Տարիներ առաջ Ադրբեջանի նախագահը չէր էլ կարող ենթադրել, որ իր երկիրը կհայտնվի նման տնտեսական ճգնաժամում, ու արդեն ԼՂՀ նախագահի խոսնակն է Ալիեւին խորհուրդ տալիս ձեռնպահ մնալ Հայաստանի եւ Արցախի հանրապետությունների դեմ դավադիր ծրագրեր մշակելուց, ավելի լավ է զբաղվել սեփական պետության ներքին խնդիրներով, փորձել շտկել դրանք: «Նրանք հույս ունեին, որ շրջափակման միջոցով կարող են ծնկի բերել Հայաստանն ու Արցախը, նրանց քաղաքականությունն իրոք ֆիասկո է ապրել»:
Կարդացեք նաև
Իր ելույթում նախագահ Սերժ Սարգսյանը հայտարարեց. «Այն մտայնությունը, որ քանի դեռ Ղարաբաղի հարցը լուծված չէ եւ Թուրքիայի կողմից իրականացվող շրջափակումը վերացված չէ, մենք լավ չենք ապրելու, անընդունելի է»:
Դավիթ Բաբայանն իր հերթին նկատում է. «Մեր ապագան շատ վտանգավոր է կապել ինչ-որ կարճաժամկետ տնտեսական օգուտների, տվյալ պահի ինչ-որ շահերի հետ: Կան շատ ավելի կարեւոր խնդիրներ` ազգային արժանապատվություն, պետության ապագա, անվտանգություն, ու անընդունելի է դրանք դիտարկել զուտ ֆինանսական կամ նյութական տեսանկյունից»:
Արմինե ՍԻՄՈՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
