Օլիմպիական հերթափոխի պետական մարզական քոլեջում շարունակվում է ծանրամարտի Հայաստանի առաջնությունը: Կանայք ավարտել են պայքարը, որոշել հանրապետության չեմպիոններին եւ մրցանակակիրներին, իսկ տղամարդիկ նոր են սկսել պայքարը: Aravot.am-ը զրուցել է կանանց ազգային հավաքականի գլխավոր մարզիչ Արտաշես Ներսիսյանի հետ:
– Գո՞հ եք արդյունքներից:
– Ընդհանուր առմամբ՝ այո: Մասնակիցներից շատերը բարելավեցին սեփական արդյունքները եւ դա չի կարող չուրախացնել: Ընդ որում, պատվո պատվանդան բարձրացողներին հաղթանակները հեշտ չտրվեցին:
– Հավաքականի հիմնական անդամները 5-ից 9 կիլոգրամով գերազանցեցին աշխարհի առաջնությունում ցույց տված կիլոգրամները, բացի Նազիկ Ավդալյանից:
Կարդացեք նաև
– Նազիկը ուսի մի փոքր վնասվածք ուներ: Նա աշխարհի անցած առաջնությունում տարիների ընդմիջումից հետո փաստորեն առաջին անգամ էր պաշտոնական խոշոր մրցահարթակ մտնում ու մի փոքր հուզվածություն կար: Հիմա խնդիրն այն է, որպեսզի նա, ինչպես ծանրամարտում են ասում, տրիկո հագնի, մտնի մրցահարթակ ու լիովին զգա այն: Բացի այդ, Նորվեգիայում կայանալիք Եվրոպայի առաջնությունը նրա համար պարտադիր է, որպեսզի լրացնի երկրորդ անհատական վարկանիշը օլիմպիական խաղերին մասնակցելու իրավունքի համար:
– Նազիկը ծանրագույն վնասվածքից հետո է վերադարձել մեծ սպորտ: Ուսի, թեկուզ թեթեւ վնասվածքով հանդես գալը վտանգավոր չէ՞ր:
– Ոչ: Այդ ամենը հաշվի էր առնվել: Անգամ աննշան կասկածի դեպքում նա այս առաջնությանը չէր մասնակցի:
– Առջեւում Եվրոպայի առաջնությունն է:
– Հիմա նախապատրաստվելու ենք այդ մրցմանը, որի արդյունքները վճռորոշ են լինելու, թե որ երկու ծանրորդները կմեկնեն Ռիո դե Ժանեյրո: Հայաստանի կին ծանրորդները աշխարհի ու Եվրոպայի առաջնություններում միշտ էլ շատ բարձր արդյունքներ են գրանցել: Բայց ամեն անգամ մեկնել ենք մի քանի մասնակցով միայն: Մենք երբեք կանանց այնպիսի ուժեղ, կայուն, ամբողջական հավաքական չենք ունեցել, ինչպիսին հիմա է: Հնարավոր է, որ պատմության մեջ առաջին անգամ Եվրոպայի առաջնությունում հանդես գանք ամբողջական կազմով ու փորձենք պայքարել թիմային բարձր տեղերի համար:
Աշոտ ՀԱԿՈԲՅԱՆ
