Շենգավիթ վարչական շրջանի ընդհանուր իրավասության առաջին ատյանի դատավոր Նելլի Բաղդասարյանը որոշում էր կայացրել փետրվարի 15-ին Վարդգես Գասպարիին բերման ենթարկել դատարան:
Քիչ առաջ Վարդգես Գասպարին Aravot.am-ին ահազանգեց, որ իրեն բերման են ենթարկել շտապօգնության մեքենայով. «Մինչեւ ոստիկանների գալը շտապօգնություն էր եկել, ես հարցրեցի, թե ինչ կանչով եք եկել, ուր եք եկել, ասացին` եկել ենք Վարդգես Գասպարիի մոտ, պետական կանչ է: Ասացի՝ ի՞նչ են հաղորդել, ասացին, որ ծանր հիվանդ վիճակով կանչ է եղել: Ասացի, որ ինչպես տեսնում եք՝ ոչ մի խնդիր չունեմ: Այնուհետեւ ոստիկանները եկան եւ շտապօգնության մեքենայով բերման ենթարկեցին: Հիմա կարելի է արձանագրել, որ շտապօգնությունը ոստիկանության ենթակայության ներքո է: Շտապօգնությունը գործում է բերման ենթարկելու համար եւ առավել եւս՝ այդ վիճակում, երբ շտապօգնության մեքենաները քչություն են անում: Այստեղ շտապօգնության մեքենան երկար ժամանակ է սպասում է, որովհետեւ ոստիկանությունը մեկին բերման է ենթարկել»:
Վարդգես Գասպարին մեզ հայտնեց, որ չնայած դատական նիստը նշանակված է ժամը 15.00-ին, ինքն այժմ դատարանի շենքում է. «Այս շտապօգնության մեքենան հիվանդների կանչի համար է, ես հիմա պատգարակից իջել եմ, որ պատգարակը ազատվի եւ տանեն հիվանդների համար օգտագործեն ըստ նպատակի եւ ոչ թե որպես ոստիկանության ենթակա ծառայություն: Ես մինչեւ հիմա պատգարակի վրա էի»:
Վարդգես Գասպարին հավելեց, որ խորհրդակցել է իր փաստաբանների հետ, որոնք ասել են, որ ոստիկանությունն իրավունք չուներ դատական նիստից այդքան շուտ Գասպարիին բերման ենթարկել եւ ոստիկաններն իրեն ասել են, որ իրեն հիմա բերման են ենթարկել, բայց եթե համաձայն չէ՝ կարող է գնալ, բողոքել որտեղ ուզում է:
Կարդացեք նաև
Ամի ՉԻՉԱԿՅԱՆ
