ԲՀԿ-ն պատրաստվում է մի շարք օրենսդրական փոփոխությունների նախագծեր ներկայացնել:
«Ծրագրային փոփոխություններ են պետք»,- ասում է ԱԺ ԲՀԿ-ական պատգամավոր Միքայել Մելքումյանը. «ԲՀԿ-ն կարեւորում է երկրի տնտեսական զարգացումը, որի ուղղությամբ բազմաթիվ առաջարկներով ենք հանդես գալու եւ հետեւողական ենք լինելու, որ դրանք իրականացվեն: Ուշադրությամբ հետեւելու ենք կառավարության աշխատանքին ու թույլ չենք տալու՝ գյուղատնտեսոության ոլորտում կրկնվի այն, ինչ տեղի ունեցավ անցած տարի: Թույլ չենք տալու, որ այս տարի էլ խաղողի, գյուղատնտեսական այլ մշակաբույսերի մթերումներից գյուղացին անօգուտ մնա, շահույթ չունենա»:
Ըստ պարոն Մելքումյանի, ՌԴ-ում ռուսական ռուբլու հետ կապված զարգացումների արդյունքում այս տարի Հայաստանի հազարավոր քաղաքացիներ չեն մեկնի արտագնա աշխատանքի. «Դա նշանակում է, որ ապագա տրանսֆերտներն ավելի քիչ ենք ստանալու: 2014 թվականի համեմատ անցած տարի տրանսֆերտները հինգ հարյուր միլիոն դոլարի չափով քիչ ստացանք, իսկ այս տարի 2014 թվականի համեմատ ութ հարյուր միլիոնից մինչեւ մեկ միլիարդ պակաս ենք ստանալու, իսկ սա նոր մարտահրավեր է: Եթե ներկրման ծավալը երեսուն տոկոսով իջել է, նաեւ վճարունակ չլինելու հանգամանքով է պայմանավորված: Մենք ունենք լուծումներ, թե ինչ պետք է լինի: Կոնկրետ ծրագրային լուծումներ ենք ասում:
Մի շարք ուղղություններ կան, պետք է կարողանանք մայիսի վերջին ու հիսուն օր շարունակ վաղահաս կարտոֆիլ մոտ 7-8.000 տոննա արտահանենք ՌԴ, որովհետեւ Թուրքիայից չի գալիս: Իսկ շրջանառությունը 20-25 միլիոն դոլարի մասին է: Հաջորդ խնդիրը վերաբերում է հայկական գինու ու պանրի արտահանմանը: Մենք արտահանում ենք 17.000 տոննա պանիր, իսկ մեր գինին ռուսական շուկայում մրցունակ չէ, որովհետեւ ինքնարժեքը երկու անգամ բարձր է չիլիական ու բուլղարական գինուց, ինչու են ուռճացված այդ ծախսերը, երկու տեղում էլ 100-120 դրամով են խաղողը մթերում, պետք է նստենք ու կառավարության պատասխանատուների հետ քննարկենք»:
Կարդացեք նաև
Արփինե ՍԻՄՈՆՅԱՆ
