Ավան եւ Նոր Նորք վարչական շրջանների ընդհանուր իրավասության դատարանը փետրվարի 15-ին կհրապարակի կեղծարարության մեջ մեղադրվող 104 դպրոցի Ինֆորմատիկայի ուսուցչուհի Անահիտ Աթայանի գործով վճիռը:
Այսօր ուսուցչուհին միջնորդեց արագացված դատաքննության կարգով անցկացնել դատաքննությունը:
Անահիտ Աթայանին մեղադրանք է առաջադրվել 2015թ. դեկտեմբերի 6-ին ՀՀ Սահմանադրության փոփոխությունների` հանրաքվեի ընթացքում թիվ 104 հիմնական դպրոցում տեղակայված 1/05 ընտրատեղամասի հանձնաժողովի անդամ լինելով՝ այլ անձանց փոխարեն քվեարկելու դիտավորությամբ, հիշյալ տեղամասի ընտրողների թիվ 1 մատյանում, Ավան 3 փողոցի թիվ 33 տանը հաշվառված Մարինե Վարդանյանի և Նաիրա Առուստամյանի տվյալների դիմաց գիտակցաբար նույնականացման քարտերի մտացածին կեղծ տվյալներ գրառելու համար, որոնց դիմաց ստորագրել և կնքել է իրեն հատկացված «Ա-53287» կնիքի դրոշմով, ապա 2 քվեաթերթիկները գցել է քվեատուփի մեջ:
Ուսուցչուհին դատարանում խոստովանեց իր մեղքը, նրա պաշտպանն էլ ներկայացրել ուսուցչուհու բնակության ու աշխատանքի վայրերից բնութագրեր:
Կարդացեք նաև
Դատախազը միջնորդեց Աթայանին մեղավոր ճանաչել Քրեական օրենսգրքի 153 հոդվածով ու նրան տուգանել 600.000 դրամով:
Վերջին խոսքում Անահիտ Աթայանը դատարանին խնդրեց չկիրառել ազատազրկման պատիժը, խնդրեց մեղմել պատիժը:
Ի դեպ, օրինախախտության մեջ մեղադրվող ուսուցչուհին դատարանում լրագրողներին դասեր տվեց. «Դաստիարակություն ունեցեք, մի քիչ կուլտուրա ունեցեք ու ինձ մի նկարեք»:
Արփինե ՍԻՄՈՆՅԱՆ
