«Մենք գտնում ենք, որ այսօր Հայաստանում առանցքային քաղաքական խնդիրն է պատասխանատվության հարցը: Այդ խնդիրը մեր երկրում ավանդական է: 2008 թվականի մարտի 1-ն առ այսօր չի ստացել իր պատշաճ իրավական գնահատականը, եւ բոլորս գիտենք, որ քաղաքացիների դեմ ուժ գործադրած, սպանություններ կատարած մարդիկ առ այսօր անպատիժ են մնացել»,- այս մասին Ազատության հրապարակում հրավիրված մամուլի ասուլիսի ընթացքում հայտարարեց «Նոր Հայաստան» նախաձեռնության քաղաքական խորհրդի անդամ Անդրիաս Ղուկասյանը:
Ըստ նրա՝ անպատիժ են նաեւ նրանք, ովքեր ղեկավարել են սպանություն կատարողներին, համակարգել են գործողություններ եւ «ովքեր կոծկել եմ համապատասխան քննչական գործողություններն այդ մարդկանց բացահայտման ուղղությամբ: Անպատասխանատվության այս երեւույթը թույլ տվեց ՀՀԿ-ին աղավաղել 2012 թվականի խորհրդարանական ընտրությունների, 2013 թ. նախագահական ընտրությունների եւ 2015թ. հանրաքվեի արդյունքները»:
Հանրաքվեի մասին զեկույցներն, Անդրիաս Ղուկասյանի կարծիքով, վկայում են Սերժ Սարգսյանի կողմից առաջարկված Սահմանադրությունը ոչ միայն չի հավաքել անհրաժեշտ թվով քվե, այլ՝ կեսից ավելին չի եղել ընդհանուր մասնակիցների. «Այսինքն` քրեական ռեժիմն իր այդ նախաձեռնությամբ դեկտեմբերի 6-ին ունեցել է մեծ պարտություն: Մենք տեսնում ենք, որ այսօր իրավապահ մարմինները շարունակում են այդ արատավոր պրակտիկան կոծկել, պատասխանատվությունից ազատ մեղավորներին»:
Աշոտ ԻՍՐԱԵԼՅԱՆ
