«Պարոն Մինասյան, ես չգիտեմ դուք վաղը որտեղ կլինեք, որտեղ կհանգրվանեք՝ նախարարի պաշտոնում, թե մարզպետի, պատգամավորի կամ չգիտեմ որտեղ, կամ որպես գիտնական կլինեք, կանխարգելիչ գործառույթներից մեկը ՄԻՊ-ի այն է, որ չնայած օմբուդսմենի լիազորությունները հիմա մի փոքր փոխվում է, բայց դա այն է, որ մենք օրենսդրական փոփոխությունների հնարավորություն ստեղծենք:
Պաշտոնապես դեռ դուք իշխանություն չեք, հետեւաբար ես խորհուրդ կտայի, որ դուք գոնե… միեւնույն է ձեր աջակցության կարիքը չկար իշխանության թեկնածուին»,- ԱԺ պետաիրավական հարցերի հանձնաժողովում օմբուդսմենի ընտրության ժամանակ ՀՅԴ պատգամավոր Արծվիկ Մինասյանին ասաց թեկնածու Զարուհի Փոստանջյանը:
Հանձնաժողովի նախագահ Հովհաննես Սահակյանը դիտողություն արեց, թե Մարդու իրավունքների պաշտպանի թեկնածու եք՝ վիրավորում եք ձեր գործընկերներին՝ անկախ նրանից՝ ընդդիմություն են, թե իշխանություն:
Զարուհի Փոստանջյանն էլ արձագանքեց. «Ինչ կա, էն եմ ասում»:
Կարդացեք նաև
Հովհաննես Սահակյանի խոսքերով՝ ախր որ ինչ կա՝ մենք էլ ասենք, ինչ կլինի:
Արծվիկ Մինասյանը միջամտեց. «Տիկին Փոստանջյանն ակնհայտորեն կաղում է պարզ թվաբանությունից: Երկրորդ՝ առաջին դեպքը չէ, երբ մարդուն արժեւորելով՝ ստանում ես պատասխան վիրավորանք: Տիկին Փոստանջյան, ձեր արտահայտած միտքը վերադարձնում եմ ձեզ՝ նույն ձեւով: Ավելին ասեմ՝ դուք անգամ այս պահին չգնահատեցիք մարդկանց արժանապատվությունը, թեեւ այնտեղ նստած՝ խոսում էիք արժանապատվության մասին: Դուք փորձում եք ձեր մրցակիցների հետ բանավիճել՝ օգտագործելով երրորդ անձի: Դա ոչ միայն արժանապատվությունից ցածր է, ես խորհուրդ կտա ձեզ ձեր խորհուրդները պահել ձեզ: Շարունակեք հետայսու էլ ձեր գործունեությունը՝ առանց անդրադառնալու որեւէ այլ բանի»:
Զարուհի Փոստանջյանը պնդեց՝ շարունակեք նույն ձեւով իշխանություններին ծառայություն մատուցել՝ նկատի ունենալով այն, որ եթե ՀՅԴ-ն որոշել է 3 թեկնածուներին էլ կողմ քվեարկել, ՀՀԿ-ի թեկնածուի օգտին 7 կողմ է լինում, այնպես որ իրեն կողմ քվեարկելը ոչ մի օգուտ չի տալիս:
Արծվիկ Մինասյանը՝ ձեռքը առաջ մեկնելով՝ ասաց. «Իշխանություններին ծառայություն մատուցողը դու ես, ա՛յ աղջի, հերի՛ք եղավ»:
ՀՀԿ պատգամավոր Վահրամ Մկրտչյանը Փոստանջյանին խորհուրդ տվեց, թե գոնե Արծվիկին մի նեղացրու, թող քվեարկի, քեզ կողմ է քվեարկելու:
Զարուհի Փոստանջյանն էլ արձագանքեց՝ ես չեմ ուզում իր կողմ-ը, թող չքվեարկի:
Արծվիկ Մինասյանն էլ հորդորեց Փոստանջյանին ինքնաբացարկ հայտնել: Երբ կրքերը մարեցին, նա, այնուամենայնիվ, կողմ քվեարկեց:
Հռիփսիմե ՋԵԲԵՋՅԱՆ
