ԱԺ Պետաիրավական հարցերի հանձնաժողովում քննարկվում է Մարդու իրավունքների պաշտպանի ընտրության հարցը:
ԲՀԿ խմբակցության պատգամավոր Տիգրան Ուրիխանյանը Զարուհի Փոստանջյանին հիշեցրեց, որ օրվա իշխանությունների դեմ անհնազանդության կոչերով է հանդես եկել ԱԺ ամբիոնից՝ կոչ արել հարյուր հազարավոր քաղաքացիների, որ ոտքի ելնեն: Եթե ընտրվի օմբուդսմեն, ի՞նչ է անելու այդ հարյուր հազարավոր քաղաքացիներին, նրանց լքելո՞ւ է:
Ըստ Ուրիխանյանի՝ «Դուք մարդ եք, որի քաղաքական համոզմունքների հետեւից եկել են մեծ թվով զանգվածներ: Ենթադրում եմ, դուք ընկել եք ծուղակի մեջ, ձեզ հատուկ չեզոքացնում են՝ «Ժառանգությունն» ավարտելու, սպառելու համար ու հատկապես՝ խորհրդարանում: Դուք ընկել եք այս ծուղակի մեջ»:
Կարդացեք նաև
Զարուհի Փոստանջյանը պատասխանեց, որ «Ժառանգությունը» միշտ պետական շահը գերադասել է կուսակցական շահից եւ այս է պատճառը, որ ինքն առաջադրվել է:
ՀՅԴ պատգամավոր Արծվիկ Մինասյանն էլ հարցրեց՝ ձեր խոսքը սկսեցիք Սահմանադրությունը չակերտավոր անվանելով: Դիցուք, դուք մարդու իրավունքների պաշտպան եք, Սահմանադրությունն ընկալելու եք որպես չակերտավո՞ր փաստաթուղթ, թե՞ փոխելու եք ձեր վերաբերմունքը:
Զարուհի Փոստանջյանը պատասխանեց, որ Սահմանադրության քննության հանձնման փուլում ենք մենք. «Քննությունը սկսեցինք Սահմանադրության սկզբունքների ոտնահարմամբ: Այս պահին այստեղ մենք զրկել ենք երկու խմբի՝ ԱԺ-ում ներկայացված խմբակցություններին,որոնք հնարավորություն չեն ունեցել ներկայացնելու իրենց թեկնածուին եւ մյուսը հասարակական կողմն է: Հանրության մեջ, երբ նայում ենք Սահմանադրության ընդունման օրը տոն չէ, այլ մի սովորական ոչ աշխատանքային օր: Մենք չենք հարգում Սահմանադրությունը: Առաջին կիրառման օրվանից էլ սկսում ենք ոտնահարել այդ Սահմանադրության ոգին»:
Ուշագրավ է, որ եւ Տիգրան Ուրիխանյանը, եւ Արծվիկ Մինասյանը հայտարարեցին, որ Զարուհի Փոստանջյանի թեկնածությանը կողմ են քվեարկելու:
Հռիփսիմե ՋԵԲԵՋՅԱՆ
