Այսօր ԱԺ պետաիրավական հարցերի հանձնաժողովում Մարդու իրավունքների պաշտպանի ընտրության հարցն է քննարկվում:
Էդմոն Մարուքյանի եւ ՕԵԿ պատգամավոր Հովհաննես Մարգարյանի թեկնածուն՝ Զարուհի Փոստանջյանը նիստին եկավ մի փոքր ուշացած:
Հանձնաժողովի նախագահ Հովհաննես Սահակյանը հետաքրքրվեց՝ պարոն Մարուքյան, հո չե՞ք փոշմանել:
Ավելի ուշ եկավ Զարուհի Փոստանջյանը, եւ ընդունված կարգի համաձայն՝ նախ ներկայացրեցին թեկնածուներին:
Կարդացեք նաև
Էդմոն Մարուքյանը Զարուհի Փոստանջյանի կենսագրությունը կարդալուց հետո հիշեցրեց, որ նա Մատաղիսի գործով ցմահ ազատազրկվածների ազատմանն է հասել. «Իմ հիշողության մեջ նա տպավորված է որպես խիզախ կին, որը պաշտպանում է մարդու իրավունքները՝ ցանկացած տեղ»:
ՀՀԿ պատգամավոր Լեւոն Մարտիրոսյանը հարցրեց. «Տիկին Փոստանջյանի անձը կապ չունի, կապ ունի իր կարգավիճակը՝ որպես պատգամավոր եւ խմբակցության ղեկավար: Ըստ ձեզ ի՞նչն է խանգարում որեւէ պատգամավորի կատարել Մարդու իրավունքների պաշտպանի աշխատանքը: Ի՞նչ հիմա չունի տիկին Փոստանջյանը, որ ունենալու է՝ ընտրվելով Մարդու իրավունքների պաշտպան»
Էդմոն Մարուքյանը զարմացած էր հարցից. «ԱԺ պատգամավորի սահմանադրական իրավունքներն ու պարտականությունները խստորեն տարբերվում են ՄԻՊ առաքելությունից: Որեւէ պատգամավոր չի կարող որեւէ քաղաքացու գործ ընդունել վարույթ, որոշում կայացնել, տեղական ինքնակառավարման մարմնին առաջարկել վերականգնել մարդու ոտնահարված իրավունքները: Սա չի կարող անել պատգամավորը: Տարբերությունն ակնհայտ է: ՄԻՊ-ը որեւէ քաղաքական ուժ չի ներկայացնում, քաղաքական մոտեցում չի ունենում: Պատգամավորը վտանգի տակ է, որ իր բարձրացրած հարցը կարող քաղաքականացվել: Պատգամավորին կասեն՝ դու այս հարցը բարձրացնում ես, որովհետեւ իշխանափոխություն ես ուզում»:
Էդմոն Մարուքյանի խոսքերով՝ եթե դուք ձեր ձայնը տաք տիկին Փոստանջյանին, նա ավելի արդյունավետ կպաշտպանի ՀՀ-ում մարդու իրավունքները, կլինի ավելի անկաշկանդ:
ԲՀԿ խմբակցության պատգամավոր Տիգրան Ուրիխանյանն էլ հարցրեց, թե ինչո՞ւ միասնական թեկնածուով հանդես գալու իր առաջարկը չի ընդունվել: Էդմոն Մարուքյանն էլ պարզաբանեց, որ «դուք ուզում էիք ես ձայն տայի ձեր թեկնածուին, դուք՝ իմ թեկնածուին: Իմ թեկնածուն Զարուհի Փոստանջյանն էր, ես չի պատկերացնում ուրիշին ձայն տալը: Հետևաբար` այդպիսի համագործակցություն ես չէի պատկերացնում»:
Էդմոն Մարուքյանն առաջարկեց, որ Ուրիխանյանի թեկնածուն ինքնաբացարկ հայտնի եւ Ուրիխանյանը պաշտպանի Զարուհի Փոստանջյանին:
Հռիփսիմե ՋԵԲԵՋՅԱՆ
