Երեկ տեղի ունեցավ Գյումրու քաղաքապետ Սամվել Բալասանյանի նախաձեռնած «Գյումրին առանց տնակների» ծրագրի նախնական նիստը, որի ժամանակ էլ միաձայն հոգաբարձուների խորհրդի նախագահ ընտրվեց Շիրակի թեմի առաջնորդ Միքայել եպիսկոպոս Աջապահյանը:
Հիշեցնենք՝ այս ծրագիրը Գյումրու քաղաքապետը նախաձեռնել է այն պատճառով, որ օգնի անօթեւան ընտանիքներին տնակներից ազատվելու, միջոցներ հայթայթի ու պայքարի անօթեւանության դեմ, քանի որ պետությունն այլեւս իր պարտականությունները կատարած, ավարտած է համարում գյումրեցիների նկատմամբ:
Ըստ քաղաքապետի, Գյումրիում կան 1014 ընտանիքներ, որոնք անօթեւանության կարգավիճակ են ունեցել, սակայն դուրս են մնացել շահառուների ցուցակի: Բացի դրանից, Գյումրիում կան 3520 տնակներ:
Կարդացեք նաև
Բավական հետաքրքիր է հոգաբարձուների խորհրդի կազմում ընդգրկված մարդկանց կազմը. նրանք թվով 21 են. կան լրատվամիջոցների ղեկավարներ. «Ցայգ» հեռուստաընկերության տնօրեն Մարգարիտա Մինասյանը, «Շիրակ» հանրային ռադիոհեռուստաընկերության տնօրեն Արթուր Ղանդիլյանը, «Շրջապատ» շաբաթաթերթի տնօրեն Եպրաքսյա Մեխակյանը, Գյումրու ժուռնալիստների «Ասպարեզ» ակումբի նախագահ Լեւոն Բարսեղյանը, քաղաքացիական ակտիվիստներ Կարեն Պետրոսյանը, Տիգրան Պետրոսյանը, Հայկարամ Դրմեյանը, Արսեն Վարդանյանը, մարզի գլխավոր մանկաբարձ-գինեկոլոգ Ֆելիքս Գրիգորյանը, Գյումրու դրամատիկական թատրոնի պրոդյուսեր Տիգրան Վիրաբյանը, ԱԺ պատգամավորներ Սուքիաս Ավետիսյանն ու Արման Սահակյանը, քանդակագործներ Արթուր Գեւորգյանն ու Արթուր Պապոյանը, իրավապաշտպան Սեյրան Մարտիրոսյանը, «Շիրակ կենտրոն»-ի ղեկավար Վահան Թումասյանը, Շիրակի մարզպետարանի ու քաղաքապետարանի պաշտոնյաներ եւ այլք:
Գյումրու քաղաքապետն առաջարկեց որպես հոգաբարձուների խորհրդի նախագահ քվեարկության դնել Միքայել Սրբազանի թեկնածությունը. հարցին ՝ կո՞ղմ եք, թե՞ դեմ, անդամներն ասացին՝ կողմ ենք, եթե Սրբազանն այդքան ժամանակ ունի:
Միքայել Աջապահյանը իր հերթին բացատրեց հոգաբարձու բառի իմաստը՝ նշելով, որ այն նշանակում է հոգս վերցնել, հոգս բարձել, հետեւաբար հոգսի տակ մտնելու ժամանակ միշտ ունի, իհարկե եթե «գործ անեն ու ջուր չծեծեն»:
Միքայել Աջապահյանը նշեց, որ չի թույլ տալու, որ այս ծրագիրը ձեւական լինի, ըստ նրա, առաջին ներդրում կատարողները պետք է լինեն հենց հավաքվածները:
Սրբազանը նշեց նաեւ, որ անցած տարիները ամոթի ու խայտառակության տարիներ են եղել գյումրեցիների համար, իսկ թե ո՞վ է մեղավոր այդ վիճակի համար, ո՞վ թերացավ, հետագայում պատմաբանները կվերլուծեն:
Նունե ԱՐԵՎՇԱՏՅԱՆ
