Այսօր Ավան եւ Նորք-Մարաշ ընդհանուր իրավասության դատարանում պետք է հրապարակվեր սահմանադրական բարեփոխումների հանրաքվեի ժամանակ ուրիշի փոխարեն քվեարկած մանկապարտեզի տնօրենի գործով վճիռը: Մեղադրյալը, սակայն, չէր ներկայացել նիստին:
Հիշեցնենք, 2015 թվականի դեկտեմբերի 6-ին կայացած սահմանադրական բարեփոխումներից հետո, Երևան քաղաքի Ավան-Առինջ թաղ. թիվ 56 մանկապարտեզում տեղակայված 1/07 ընտրատեղամասի հանձնաժողովի անդամ, նույն մանկապարտեզի տնօրեն Կարինե Ստեփանյանին մեղադրանք էր առաջադրվել` Երևան քաղաքի Ավան-Առինջ 2/13 շենքի թիվ 18 բնակարանում հաշվառված Մանե Վանյայի Թանդիլյանի տվյալների դիմաց գրառում կատարելու եւ նրա փոխարեն քվեարկելու համար:
Նախորդ դատական նիստում Կարինե Ստեփանյանն ընդունել էր իր մեղքը: Նիստը հետաձգվեց`դատարանին պատիժը մեղմացնող հանգամանքներ ներկայացնելու համար նաեւ: Սակայն այսօր պարզվեց, որ մեղադրյալը հիվանդության պատճառով չի ներկայացել նիստին:
Դատավորն անհարգելի համարեց բացակայությունը, քանի որ կողմը դատարանին նախօրոք եւ պատշաճ չէին տեղեկացրել:
Կարդացեք նաև
Հաջորդ դատական նիստը կկայանա փետրվարի 25-ին:
Նելլի ԳՐԻԳՈՐՅԱՆ
