Այսօր կառավարության նիստից հետո լրագրողները փորձեցին սպասվող պաշտոնանկությունների վերաբերյալ պարզաբանումներ ստանալ էկոնոմիկայի նախարար Կարեն Ճշմարիտյանից, կրթության եւ գիտության նախարար Արմեն Աշոտյանից: Այս երկու նախարարները սովորաբար կառավարության նիստերից հետո միշտ պատասխանել են լրագրողների հարցերին: Սակայն այսօր երկուսն էլ խուսափեցին իրենց պաշտոնանկությունների վերաբերյալ հարցերին պատասխանել, նշելով, որ վաղը ամեն ինչ պարզ կլինի ՀՀԿ խորհրդի նիստում:
Նիստից հետո, ըստ էության, ՀՀ վարչապետ Հովիկ Աբրահամյանի այն հրամանը, որ չխուսափեն եւ պատասխանեն լրագրողների հարցերին, այսօր չկատարեցին ֆինանսների փոխնախարար Պավել Սաֆարյանը եւ Կենտրոնական բանկի նախագահի տեղակալ Ներսես Երիցյանը: Այս երկուսին լրագրողների եւ օպերատորների կազմած պատն էլ չխանգարեց: Երիցյանն ու Սաֆարյանը բավականին վարպետորեն խուսափեցին լրագրողներից:
Նելլի ԲԱԲԱՅԱՆ
