Օրերս ՀՀ ԿԳՆ հրապարակեց 2015 թվականի Հայաստանի Հանրապետության հանրակրթական ուսումնական հաստատությունների վարկանիշավորման արդյունքները: Պաշտոնական ներկայացման ժամանակ և այդ մասին հրապարակված հաղորդագրություններում Երևանի Անանիա Շիրակացու անվան Ճեմարանի մասին տեղեկատվության բացակայությունը հանրության շրջանում տարակարծությունների և թյուրըմբռնման տեղիք է տվել, որի վկայությունը վերջին օրերին ստացվող բազմաթիվ հեռախոսազանգերի և հաղորդագրությունների տարափն է:
Հարկ ենք համարում տեղեկացնել, որ դեռևս 2015 թ. դեկտեմբերին կրթահամալիրի տնօրենության խորհրդում հանգամանորեն քննարկվել է վարկանիշավորմանը մասնակցելու հրավերը և որոշում է կայացվել գործընթացին չմասնակցելու մասին՝ օգտվելով ոլորտը կարգավորող օրենսդրությամբ վերապահված իրավունքից և հիմնվելով ծանրակշիռ փաստարկների վրա:
Նախ՝ Ճեմարանը՝ որպես մեր երկրում Միջազգային բակալավրիատի ամբողջական կրթական ծրագիր (ավագ, միջին և կրտսեր դպրոցներ) իրականացնող միակ հաստատություն, ինչպես նաև իր ստեղծման օրից շնորհալի երեխաների կրթության կազմակերպման հեղինակային կրթական ծրագրով առաջնորդվող կրթարան, արդեն իսկ միջազգայնորեն հավաստագրված վարկանիշ ունի: Կրթահամալիրի մասնակցության դեպքում պայմանները հավասար չէին լինի մյուս դպրոցների համար:
Բացի վերոնշյալից՝ վարկանիշավորման ներկա համակարգի սկզբունքներն ու չափանիշները մասամբ չեն համապատասխանում, երբեմն էլ հակասում են Միջազգային բակալավրիատի կրթական ծրագրի պահանջներին և գաղափարախոսությանը:
Կարդացեք նաև
Ճեմարանում կազմակերպված քննարկման ժամանակ այս հարցի վերաբերյալ մեր տեսակետը և դիրքորոշումը մանրամասնորեն ներկայացվել են վարկանիշավորումն անմիջականորեն իրականացնող Կրթական տեխնոլոգիաների ազգային կենտրոնի տնօրենին և հայտարարվել է վարկանիշավորման գործընթացին չմասնակցելու որոշման մասին:
Այնպես որ իրոք զարմանալի է, թե ինչո՛ւ վարկանիշավորման արդյունքների պաշտոնական հրապարակումներում անդրադարձ չի կատարվել ճեմարանի՝ գործընթացին չմասնակցելու դիրքորոշմանը:
ՇԻՐԱԿԱՑՈՒ ՃԵՄԱՐԱՆԻ ՏՆՕՐԵՆՈՒԹՅՈՒՆ
