Գեղասահքում անարդարությունը միշտ էլ եղել է ու մրցավարությունը միշտ էլ դաժան է վարվել մարզիկների հետ, Aravot.am-ի հետ զրույցում ասաց Հայաստանի գեղասահքի ֆեդերացիայի նախագահ Մելանյա Ստեփանյանը՝ նշելով, որ իր ժամանակ էլ էր այդպես:
Հարցազրույցը, որում անդրադարձ է արվում նաեւ Բրատիսլավայում մեր մյուս գեղասահորդների, Ռուսաստանի կազմում չեմպիոնուհի դարձած Եվգենիա Մեդվեդեւայի (Բաբասյան) մասին, կարդացեք «Առավոտ» օրաթերթի առաջիկա համարներից մեկում:
Բրատիսլավայում անցկացված գեղասահքի Եվրոպայի առաջնությունում մենասահորդուհի Անաստասիա Գալուստյանը ընդհանուր հաշվարկով զբաղեցրեց 15-րդ հորիզոնականը: Սակայն մասնագետները եւ առաջնությանը հետեւող լրատվամիջոցները միաձայն նշում են մի բան. մրցավարները շատ դաժան վարվեցին Հայաստանի ազգային հավաքականի անդամի հետ: Այդ համոզմանն է նաեւ Մելանյա Ստեփանյանը: «Անաստասիա Գալուստյանը կարճ ծրագրում շատ լավ ելույթ ունեցավ: Նրա ելույթների լավագույն գնահատականը տվեցին հեռուստամեկնաբանները, հատկապես գեղասահքի լեգենդ Տատյանա Տարասովան, որը մի քանի անգամ շեշտեց, որ մեր աղջկա հետ շատ դաժան, գազանաբար վարվեցին: Ավելին ասեմ, եթե հետեւել եք նրա եւ երկրորդ մեկնաբանի խոսքերին, պետք է հիշեք, որ նրանք ասում էին, թե գրազ էին եկել, որ Անաստասիան տեղ է զբաղեցնելու լավագույն վեցյակում: Հավատացեք, որ Տարասովան հազվադեպ է այդպես արտահայտվում:
Առաջնությունում միակ թերությունն այն էր, որ մենք այնտեղ մրցավար չունեինք: Ճիշտ է, մրցավարական խմբում մի հայ կար՝ Սարգիս Թեւանյանը, որը 25 տարուց ավելի է Հայաստանից տեղափոխվել է Լեհաստան: Որպես հայ,նա կարող էր մրցավարների հետ բանավիճել ճիշտ գնահատելու համար: Բայց չարեց: Ես այդ ամբողջ ընթացքում մերոնց հետ մշտական կապի մեջ եմ եղել: Կարճ ծրագրից հետո Անաստասիան զանգել էր ու լաց էր լինում, թե ինքը նորմալ սահեց, ինչո՞ւ իրեն այդքան քիչ միավոր տվեցին: Ես նրան հանգստացնում էի՝ ասելով, որ մեզ նրա գրավելիք տեղը չի հետաքրքրում ու հորդորում, որ կամավոր ծրագրում լուրջ վրիպումներ թույլ չտա: Եվ պատկերացրեք, որ 16-ամյա աղջնակը չկոտրվեց ու ազատ ծրագիրն էլ կայուն բարձր մակարդակով կատարեց»:
Կարդացեք նաև
Աշոտ ՀԱԿՈԲՅԱՆ
