«Բանակի ղեկավարությունը իր դռները, իր պարիսպները, իր գիրկը բացել է ժողովրդի համար, եւ բացի այն խնդիրներից, որոնք որ գաղտնիություն են պարունակում, մնացած բոլոր առումներով մենք մեր ժողովրդի հետ ենք, մեր ժողովրդից թաքցնելու ոչինչ չունենք»,- փետրվարի 9-ին Երեւանի պետական համալսարան կատարած այցելության ընթացքում հայտարարեց պաշտպանության նախարար Սեյրան Օհանյանը:
Նա նշեց, որ իրենք բարձրացնում են հրամանատարների դերակատարությունը, որպեսզի բանակը դառնա զտիչ մի կենտրոն, եւ իր զտիչ հատկությամբ չթողնի, որ արատավոր երեւույթները մտնեն բանակ:
Սեյրան Օհանյանը հայտարարեց, որ բանակում արգելել է օգտագործել 2 ընդունված արտահայտություն. «Առաջինը՝ հայտնի արտահայտությունը, որ բանակը հասարակության հայելին է: Արգելել եմ. այս արտահայտությամբ մենք արդարացնում ենք այն դեպքերը, որոնք մերթընդմերթ բանակում լինում են: Եվ բանակը մենք արդեն վերածել ենք մի դերակատարության, որ մեր տունն է, մեր ամրոցն է, մեր ամրոցում՝ մեր օրենքներով, ով չի ուզում ապրել մեր օրենքներով, կարող է գնալ ապրել ուրիշ ամրոցի, ուրիշ բերդի օրենքներով, այսինքն՝ այդ զտիչ դերակատարությունը մենք փորձում ենք իրականացնել, չէ՞ որ ազատ հասարակությունից բանակը տարբերվում է իր ռեժիմային կարգապահությամբ, համապատասխան կազմակերպվածությամբ օժտված հնարավորություններով, եւ այնտեղ արատավոր բարքերի դեմ պայքարը կարելի է ավելի հետեւողական մղել, քան ազատ հասարակության մեջ:
Եվ երկրորդը, որ արգելել եմ՝ ասում են՝ բոլոր բանակներում այդպիսի դեպքեր լինում են: Արգելել եմ, որովհետեւ մենք ազգային բանակի վերջնական ձեւավորման կամ կատարելիության հասնելու վերջնագծում ենք գտնվում, որտեղ բացառիկ աստիճանի պետք է լինեն հայրենասիրության բարձր հատկանիշները, մեր ազգային ավանդույթները, դարերով մեզ փոխանցված ռազմական գիտության հենքի վրա եւ նաեւ ժամանակակից չափորոշիչների հիման վրա ձեւավորվող այսօրվա ռազմական ավանդույթները, մարդկային բացառիկ հարաբերությունները»:
Կարդացեք նաև
Ամի ՉԻՉԱԿՅԱՆ
