Պոլսահայ համայնքի պատրիարքի ընտրության խնդրի լուծումը պատրաստվում են տալ Մայր աթոռում եկող շաբաթ կայանալիք եպիսկոպոսաց ժողովում: Հայաստան կժամանեն Հայ առաքելական եկեղեցու բոլոր թեմերի առաջնորդները, որոնք կաթողիկոսի գլխավորությամբ կքննարկեն նշված համայնքի աթոռակից պատրիարքի ընտրության անցկացման և թեկնածուների հարցը:
Ըստ տարածաշրջանային հարցերով վերլուծաբան-փորձագետ, պոլսահայ Սարգիս Հացպանյանի՝ աթոռակից պատրիարքի թեկնածուները չորսն են՝ Գերմանիայում հայ եկեղեցական համայնքի առաջնորդ Գագիկ արքեպիսկոպոս Բեկչյանը, Գուգարաց թեմի առաջնորդ Սեպուհ արքեպիսկոպոս Չուլջյանը, ԱՄՆ-ում գործող միջեկեղեցական հանձնաժողովում Հայ առաքելական եկեղեցու ներկայացուցիչ Վիգեն արքեպիսկոպոս Այքազյանը, Արևելյան թեմի առաջնորդ Խաժակ արքեպիսկոպոս Պարսամյանը:
Հացպանյանը հայտնեց, որ Թուրքիայում գործող այլ հոգևորականներ նույնպես կարող են իրենց թեկնածությունն առաջադրել: Լոզանի դաշնագրի համաձայն՝ Թուրքիայում հայ համայնքի պատրիարք կարող է ընտրվել միայն այդ երկրում ծնված հոգևորականը:
Ավելի վաղ Թուրքիայի հայ համայնքը դատարան է դիմել՝ Մեսրոպ արքեպիսկոպոս Մութաֆյանի մորը պատրիարքին ներկայացնող լիազորված անձ նշանակելու համար, որը թույլ կտա առաջնորդի կենդանության օրոք ընտրել աթոռակից պատրիարքի: Դատարանի անցկացրած փորձաքննությունները հաստատել են պատրիարքի՝ անգործունակ լինելու փաստը:
Կարդացեք նաև
«Մեսրոպ արքեպիսկոպոս Մութաֆյանը դեռ ողջ է, բայց չի կարողանում կատարել պատրիարքի իր պարտականությունները անբուժելի հիվանդության պատճառով, ինչի համար նրան փոխանորդ է նշանակվել Արամ արքեպիսկոպոս Աթեշյանը, որն Անկարայի օգնությամբ խոչընդոտում է նոր պատրիարքի ընտրություններ անցկացնելուն»,- ասաց վերլուծաբանը:
Փորձագետը մտահոգություն հայտնեց, որ հայերի նկատմամբ շարունակվում են բռնաճնշումները, իսկ պատրիարքարանը որևէ արձագանք չի տալիս դրանց և ոչ մի աջակցություն չի ցուցաբերում տուժողներին: «Վերջին անգամ, երբ պատրիարքարանը «անգլուխ» էր մնացել՝ պատրիարքին աքսորել էին Օսմանյան կայսրությունից, իրականացրին Հայոց ցեղասպանությունը»,- ընդգծեց Հացպանյանը:
Նշենք, որ 1960 թվականից հայ համայնքը զրկված է աշխարհիկ առաջնորդ ունենալու իրավունքից:
Շուշան ԳԱԼՍՏՅԱՆ
