«ԺՀՄԻԳ-ն ընդհանրապես չի զբաղվում հանրաքվեների դիտարկմամբ, որովհետեւ ԵԱՀԿ անդամ երկրներն այդպիսի հանձնառություններ չեն ստանձնել: Չնայած դրան՝ Հայաստանը հրավիրեց ԺՀՄԻԳ-ին, որպեսզի հանրաքվեն անցկացվի հնարավորինս թափանցիկ եւ շատ դիտորդների ներկայությամբ»,- անդրադառնալով Սահմանադրական փոփոխությունների հանրաքվեի վերաբերյալ ԵԱՀԿ/ԺՀՄԻԳ-ի եզրակացությանը՝ լրագրողների հետ հանդիպմանն այս հայտարարությունն արեց ՀՀ արտաքին գործերի նախարար Էդվարդ Նալբանդյանը:
Նա նշեց, որ Հայաստանն ամբողջական ազատություն է տվել ԺՀՄԻԳ-ին թե դիտորդների քանակի առումով, թե դիտարկման ձեւաչափի եւ եղանակի առումով. «ԺՀՄԻԳ-ը որոշեց միայն 4 դիտորդ ուղարկել կարճ ժամանակով: Ի լրացումն այն մեկնաբանությանը, որը տվել էր ԿԸՀ նախագահը եւ այլ պաշտոնատար անձինք, ես կարող եմ ասել, որ մեզ ուղղված նամակում բարձր էր գնահատվում այն շարունակական, արդյունավետ համագործակցությունը, որը հաստատվել է Հայաստանի եւ ԺՀՄԻԳ-ի միջեւ»:
Նամակում հույս է հայտնվում, որ այն առաջարկները, որոնք արվել են այս զեկույցում, Հայաստանը նկատի կառնի եւ ԺՀՄԻԳ-ի հետ համագործակցությունը կշարունակվի նույն ոգով, ուղղված ապագա էլ ավելի ընտրական համակարգի բարելավմանը. «Ես ձեզ ասեմ, որ Հայաստանն, իհարկե, շահագրգռված է այդ համագործակցության շարունակման մեջ»:
Աշոտ ԻՍՐԱԵԼՅԱՆ
