«Անդրադարձանք առեւտրատնտեսական, կրթական, գիտական, մշակութային, առողջապահության ոլորտում համագործակցության զարգացման հնարավորություններին: Պայմանավորվեցինք իրավապայմանագրային դաշտի կատարելագործման, ներդրումների խթանման շուրջ»,- այս մասին պաշտոնական այցով Հայաստան ժամանած Շվեդիայի արտաքին գործերի նախարար Մարգոտ Վալստրյոմի հետ հանդիպումից հետո հայտարարեց ՀՀ ԱԳ նախարար Էդվարդ Նալբանդյանը:
Հայաստանի արտաքին քաղաքական գերատեսչության ղեկավարը հայտնեց, որ Շվեդիայի ԱԳ նախարարի հետ ստորագրել են «Գույքի եւ եկամուտի կրկնակի հարկումը բացառելու եւ հարկերից խուսափելը կանխելու մասին» համաձայնագիրը: «Որպես երկկողմ փոխգործակցության կարեւոր դաշտ, առանձնացրեցինք տեղեկատվական տեխնոլոգիաների ոլորտը: Անդրադարձանք Հայաստան-ԵՄ հարաբերություններին, կարեւորեցինք նոր բանակցությունների մեկնարկը»:
Նախարարների հանդիպման ընթացքում խոսվել է նաեւ Լեռնային Ղարաբաղի հակամարտության կարգավորման գործընթացի մասին:
Շվեդիայի արտաքին գործերի նախարար Մարգոտ Վալստրյոմն էլ նշեց, որ ստորագրված համաձայնագիրը մեծ քայլ է երկու երկրների հարաբերություններն ամրապնդելու գործում. «Շվեդիայի քաղաքացիների այսուհետ կկարողանալ հեշտությամբ հաստատվել Հայաստանում եւ հակառակը: Նույնը վերաբերվում է նաեւ Հայաստանին»:
Կարդացեք նաև
Մարգո Վալստրոյմը Հայաստանին շնորհավորեց ԵՄ-ի հետ նոր բանակցություններ սկսելու առթիվ: «Այն կծառայի մեր ընդհանուր շահերին եւ արժեքներին ու շատ օգտակար հարթակ կտրամադրի հետագայի համար»:
Նա հայտարարեց, որ Լեռնային Ղարաբաղի հակամարտության լուծման ռազմական ճանապարհ չկա. «Մենք ամեն ինչ պետք է անենք, որպեսզի հակամարտությունը չսրվի: Հակառակը, պետք է խաղաղ լուծում գտնել Մինսկի խմբի ձեւաչափով»:
Աշոտ ԻՍՐԱԵԼՅԱՆ
