Վարչական դատարանում փետրվարի 8-ին դատավոր Հրաչ Այվազյանի նախագահությամբ շարունակում էր քննվել ոստիկանության հայցն ընդդեմ Արման Ավետիսյանի եւ նրա հակընդդեմ հայցը:
Ոստիկանության ներկայացուցիչը դատական նիստին չէր ներկայացել, եւ Արման Ավետիսյանի ներկայացուցիչ Սերգեյ Գրիգորյանը հայտարարեց, որ հնարավոր է այդ պայմաններում դատական նիստը շարունակել:
Դատարան էր ներկայացել գործով երկու վկաներից մեկը՝ Արմեն Սեդրակյանը, Սերգեյ Գրիգորյանը հայտարարեց, որ դատարանը պետք է համապատասխան միջոցներ ձեռնարկեր, որ վկա ոստիկանության աշխատակից Սպարտակ Ղազարյանը մասնակցեր դատական նիստին: Նա նշեց, որ կողմը միջնորդել էր, որ դատարանը բերման ենթարկի, սակայն Հրաչ Այվազյանն ասաց, որ նման որոշում չի կայացել:
Սերգեյ Գրիգորյանը միջնորդություն ներկայացրեց, որպեսզի դատարանը նրան բերման ենթարկի դատական նիստերի դահլիճ:
Կարդացեք նաև
Դատավոր Այվազյանը հայտարարեց, որ դատարանը իր դիրքորոշումը կարտահայտի համապատասխան որոշմամբ: Սերգեյ Գրիգորյանը հետաքրքրվեց, թե ինչո՞ւ է դատարանը հետաձգում միջնորդության քննությունը, Հրաչ Այվազյանը պատասխանեց, որ չի հետաձգում եւ իր դիրքորոշումը կհայտնի. «Դատարանը կանդրադառնա վկայի չներկայանալուն եւ համապատասխան միջոցներ կձեռնարկվեն: Դատարանն էլ է գտնում, որ չներկայանալը խոչընդոտում է գործի քննությանը, եւ համապատասխան դիրքորոշում կներկայացնի»:
Սերգեյ Գրիգորյանը միջնորդեց նաեւ, որպեսզի որպես ապացույց ներգրավվի Արման Ավետիսյանի առնչությամբ ոստիկանության գրանցամատյանում մուտքի եւ ելքի պատճենը: Դատավորը նշեց, որ գործի նյութերում առկա է, Սերգեյ Գրիգորյանը նշեց, որ կողմին չեն տրամադրել եւ ցանկություն հայտնեց ծանոթանալ փաստաթղթի հետ, եւ հրաժարվեց ներկայացրած միջնորդությունից:
Հիշեցնենք, որ ոստիկանությունը վարչական իրավախախտումների վերաբերյալ օրենսգրքի 182 հոդվածով, այն է` ոստիկանության ծառայողի օրինական պահանջը չկատարելը, հայց էր ներկայացրել դատարան՝ պահանջելով Արման Ավետիսյանին 50 հազար դրամի չափով ենթարկել պատասխանատվության: Արման Ավետիսյանը դիմել է հակընդդեմ հայցով՝ պահանջելով ոչ իրավաչափ ճանաչել ոստիկանների միջամտող գործողությունները եւ պատասխանողից հօգուտ հակընդդեմ հայցվորի դատական ծախսերը, այդ թվում փաստաբանի խելամիտ վարձատրությունը բռնագանձել:
Ամի ՉԻՉԱԿՅԱՆ
